Noh jingïarap ka AKHAF sha ki longïing kiba la shahktah ha ki bor jong ka mariang

Mawkyrwat, Naitung 11: Ka All Khasi Hills A’chik Federation (AKHAF) da ka mynsiem jong ka jingsngewlem na ka bynta ki longïing kiba la shahktah ha ki bor jong ka mariang ha une u bnai uba la dep, mynta ka sngi ki la leit ban noh jingïarap da u khaw sha ki spah ngut ki briew.
Ha ka kyrwoh na u Clivestar Ch. Marak, President of All Khasi Hills A’chik Federation (AKHAF) u la ïathuh ba kane ka jingleit ai jingïarap da u khaw ka long na ka bynta ki longïing kiba don ha ka thaiñ Moheskola, South West khasi Hills kaba hap ha ka Ranikor C&RD Block kiba la shahktah bad shah pynjot ha ki bor jong ka mariang. U la ïathuh ruh ba ki don kumba 15 tylli ki shnong kiba la shahktah kum ka jinghap khyndew ki ïing, ka jingshahtyllep um tang na ka daw jong ka jingwan jong u slapuba jur ha ki tarik 16 bad 17 u Jylliew, 2022.
“Ha kito ki tarik kum ka kynhun da i bor i ba rit ka la leit ban jngoh bad ïarap ruh ïa ki longïing bad ïoh ruh ban pynbha ïa ka surok ha ka thaiñ Bosora khnang ba ki paidbah kin nym ïa kynduh jingeh”, ong u Clivestar Ch. Marak. Namarkata, u la pynpaw ka jingaikhublei na ka bynta ki paidbah nongshong shnong kiba la ai ka jingkyrshan bad ai ka kti kamon ka kti kadiang na ka bynta ka seng ha kum kane ka por ba ki ki donkam.
Ha kaba ïa dei pat bad ka umbam umdih, ka seng ka la buh ruh ka jingkyrpad ïa ka bynta ka ophis jong ka PHE jong ka Ranikor Sub-Division, South West Khasi Hills ba ka dei ban leh ei mardor namar da ka jingwan lynshop jong ki bor ka mariang bun ki pipe ba pynpoi um ha ki shnong ki la dkut bad ki paidbah nongshong shnong ruh ki la shem jingeh namar kim ïoh shuh ïa ka um ban dih kaba biang.
Namarkata, kum ki paidbah nongshong shnong ki la pynpaw ka jingaikhublei na ka bynta ki nongïalam jong ka AKHAF kaba la leh ïa kine ki kam kiba bha ban wan ïarap ïa ha kum kane ka por. Kumta ki la ai ka jingkitbok kitrwiang na ka bynta ki nongïalam ba kin nang lah ban pyntyllun ïa ki kam kiba bha nangne shakhmat.