Shillong, Nailur 07 : U MLA ka BJP ba dei ruh u Myntri ka tnad Arts & Culture ka sorkar jylla Bah Sanbor Shullai ha ka sngi Balang u la ong ba un ym weng satia na ka sorkar synrop ba ïalam da ka NPP, ka Meghalaya Democratic Alliance.
Katei ka jingkren jong utei u MLA ka BJP na Shillong South kadei hadien ba u National Vice President ka BJP ba dei peit ïa ka Meghalaya, u Dr.Chuba Ao dang shen u la pynbna ba ka party kan sa rai ban weng noh na ka sorkar MDA hapoh shibnai.
Hynrei na ka liang u Bah Sanbor u la ong, “Ka BJP kan ym weng satia na ka sorkar hynrei kan ïai bteng haduh ba kut ka por,” ong u Bah Sanbor ha ka kyrwoh khubor.
Da kaba kubur ïa ka jingkren jong u General Secretary ka Shillong South, ba lada weng noh na ka sorkar ha kum kane ka por kan sa kyrtoh kylla namar kan pynlong ïa ki paidbah ban pyrkhat bakla bad ong pynban kaei kaban jia lada hap ban ïa treilang biang bad kijuh ki party ha u 2023 ruh.
Kumta halor kane, u Myntri u la kyntu ïa baroh ki nongïalam ka BJP ba kin kiar na kaba kren kum kitei ki kyntien kaba lah ban ktah ïa ka jingïadei bad kiwei pat ki party.
“Ngi la dei ban pynleit jingmut pynban kumba la kdew da u BL Santosh National General Secretary ba la ai jingmut ïangi ban pynleit jingmut ban jop kham bun ngut bad kyntiew ïa jingdon ki nongkyrshan,” u la ong.
Da kaba kam ba ka BJP ka la nang ïohbor shuh shuh ha Meghalaya, u Bah Sanbor u la ong ba ka party mynta ka buh thong ban kot phew ngut kiban jop ha kane ka elekshon.
“Ngi la pynkhreh bha bad ngin ïakhun tyngeh mynta ka kynti ban pyntikna ba ka BJP kan ïoh jaka ha kane ka jylla.”
