Nongstoiñ, Rymphang 17: Ha ki snem ba mynshuwa na ka liang jong ka sorkar Assam ka la pyrshang la bunsien bunsien ban den ïa ka wah Khri kaba don ha Kyrshai ha kaba ka la aiti ha ka Brahmaputra Board ba kan pyndep ïa ka jingsorjamin hynrei na ka liang ki paidbah ryngkatlang bad u (L) Hopingstone Lyngdoh, (L) Pastor P.B.M.Basaïawmoit bad u bah K.P.Pangñiang MLA barim ka Rambrai- Jyrngam, da kaba tyngeh ki la ïeng pyrshah ïakatei ka jingthmu bad ka sorkar Assam ruh ka la hap ban pynsangeh noh.
Watla katta ruh ha u snem ba ladep ki paidbah ki la ïoh jingtip ba na ka liang u myntri rangbah ka jylla Assam, u Himanta Bisawa Sarma bad u Conrad Sangma, myntri rangbah ka jylla Meghalaya ki la pyrshang ban ïakren biang halor katei ka mat. Kumta na ka liang ki nongïalam jong ki sanphew wei tylli ki shnong kynthup ki Khasi, Garo bad ki Rabha ki la thaw da kawei ka kynhun kaba la tip kum ka Assam Meghalaya Joint Protection Committee na ka bynta ban pyrshah ïakatei ka jingthmu.
Na ka liang u bah Albert Nonglang, president jong katei ka kynhun haba ïakren bad u nongthohkhubor ha kine ki khyndiat sngi, u la ong ba ha u snem ba ladep ki nongïalam ka synjuk ki la leit ban ai da ka jingthoh ha u bah Garod L.S.N.Dykes, Deputy Commissioner ba rim ka West Khasi hills ba un tuklar lem halor katei ka mat bad ba hadien kata ki la leit ban ai jingthoh ruh sha u Deputy Commissioner jong ka Kamrup District, jong ka jylla Assam, nangta shuh shuh kila ai sha u Myntri Rangbah ka Assam, Myntri Rangbah ka Meghalaya bad sha ka Excecutive Committee jong ka Khasi Hills Autonomous District Council ban pynpaw ba na ka liang ki paidbah nongshong shnong jong kane ka thaiñ kin ym shah dalei lei ba ka sorkar Assam kan pyntrei ïakatei ka jingthmu ban den ïa ka wah Khri.
U bah Nonglang, u la ïathuh ruh ba ha u snem ba ladep, na ka liang ka sorkar Assam ka la pynbna ba kan pynlong da ka jingpynsngew paidbah halor katei ka jingthmu bad ka la pynpaw ba lada ki paidbah nognshong shnong ki mynjur kan sa sdang biang ban pyntrei hynrei kumba ka paw haduh mynta kam pat satia kata ka jingpynsngew paidbah.
Kumta na ka liang ka AMJPC ruh haduh mynta kam pat ïoh jingtip ei ei halor katei ka jingthmu ban pynlong ïa ka jingpynsngew paidbah da ka sorkar Assam bad lada ka AMJPC ka lap ba ki don kino kino ki dak ki shin kan sa lum da ka jingïalang bad ban buddien bad ban ym ailad da lei lei ruh em bad kin ïeng pyrshah beit haduh ba kut, la bynrap biang u bah Nonglang.
