Nongstoiñ, Risaw 29: Ka jingkhot tender jong ka sorkar ban tei ïa ka main building jong ka Rimuliang Block ophis, khlem da jer kyrteng ïa ka shnong bad ka jaka ban tei, ka la pynkhihwin ïa ki paitbah nongshong shnong jong ki sawphew ar tylli ki shnong bad ka la pynartatien haduh katta katta ïa ki paitbah.
Ha ka jingtwad jingmut jong u nongthoh khubor na kiba bun ba lang, halor katei ka jingkhot tender jong ka sorkar khlem da kdew ïa ka shnong bad ka jaka don, ki riew rangbah kiba ong ba lada ka sorkar ka pynkynriah sha kiwei ki shnong ïa katei ka Block ophis ki lah ban pynlong da ki jingïakhih kiba tyngeh.
Don kiba ong ba lada ka Block ophis ka kynriah na ka shnong Nonglang, ka lah ban don ka jingïapeit khmat kaba jur bha hapdeng ki para nongshong shnong jong ka thaiñ bad ka lah ruh ban wan rah wat ïa ka jingpynïapher shnong ruh, namar ha Rimuliang kiba nongshong shnong kiba kham bun pait ki dei ki Maram, bud sa ki Muliang, nangta sa ki Garo bad ka ktien ka thylliej ruh ka ïapher bak lybak, namar ka ktien Maram ka ïapher na ka ktien Muliang ka ktien Garo ka ïapher na ka ktien Maram bad Muliang.
Dei halor katei ka nongrim ba ki paitbah nongshong shnong ki ong ba ka sorkar ka dei ban sngewthuh, ba bunsien haba ka ktien ka thylliej ka ïapher ka don beit ka jingsngew kyrpang ha kiba bun ki liang.
Don pat kiba ong ba man la ka ka por sha ka por haba don ki kynrum kynram lane ki jingïakhih, ka sorkar ka ju kyntu ïa ki paitbah ba kim dei ban wanrah ïa kano kano ka jingsngew ïapher jaitbynriew, sngew ïapher niam ne kynhun, khnang ba kan don ka jingshong suk shong shngaiñ ha ki shnong ki thaw bad ha ka jylla hi baroh kawei. Hynrei lada ka sorkar kan pynkynriah ïa ka Block ophis na Nonglang sha kiwei pat ki shnong, ka pyni ba dei ka sorkar kaba hikai ban pynsngew ïapher jaitbynriew.
Haba phai pat sha ka jingbun jong ki shnong, palat marshiteng na ki shnong kiba hap ha ka Rimuliang C&RD Block ki kwah ba kan Block ophis kan dei ban don ha Nonglang, namar ka surok ka la biang, ka bording ka la biang, ka um bam um dih ka la biang bad ka dei ruh ka jaka pdeng jong ka khaïi ka pateng, ka pule puthi bad kiwei kiwei.
Kawei pat ka mat kaba ki paitbah ki pynpaw ka long ba naduh ba ka jingdawa ba ka sorkar kan pynïoh C&RD Block ha ka thaiñ Muliang, ka dei kaba la slem bah bad la dawa ruh ba ïa ka ophis jong ka Block dei ban buh ha ka shnong Nonglang. Ha ka por ba u Myntri Rangbah buh ïa u maw nongrim bad plie artad ïa ka ophis ba shi por ruh ka dei ha ka shnong Nonglang, kumta lada pynkynriah sha kiwei pat ki shnong kan long ka jinglehraiñ kaba jur ïa u Myntri Rangbah bad ka sorkar.
Ha kajuh ka por na ka liang ki paitbah jong ki sawphew artylli ki shnong, ki la ong ba lada ka sorkar kan pynkynriah ïa ka Block ophis na ka shnong Nonglang, ka dei ban pynphai ïa ki sawphew ar tylli ki shnong sha Mawshynrut Block kumba ki ju don baroh shi katta, khnang ba ka kynhun kaba dawa ban rah ïa ka Block ophis sha shnong Tynghor kan suk mynsiem bad kan sngewkmen kumba ki la kwah.
Nalor kata ki la ong ruh ba lada ka jaka kaba ki trai khyndew ki la ai sngewbha kam biang, ka sorkar ka la dei ban pynshai khnang ban ai noh da ka jaka kaba kham biang. Mynta na ka liang ka ka Seng khyndew jong ka shnong Nonglang ki la tyrwa da kawei pat ka jaka kaba biang bha na ka bynta ban tei ïa katei ka Block ophis.
