Shillong, Ïaiong 27: U Myntri Rangbah ka Jylla Conrad Kongkal Sangma hynne ka sngi balang ula kren shai ba ka Jylla kan ym lah satia ban ïapynbeit ïa ka jingïakajia pud bad ka Assam lada ka ïaid beit thik kat kum ki kot ki sla, ki map bad u pud u sam ki It ki Hima (historical facts).
“Lada ngi bat beit triang kat kum ki kot ki sla, ki map bad ki pud ki sam ki It ki Hima, ngin nym lah satia da lei lei ruh ban ïapynbeit ïa ka jingïakajia pud bad ka Assam. Ngin shu kut tang ha ki jingïalang bad shim rai ban pynneh ïa ka status quo” ong u Myntri Rangbah ka Jylla haba ïakren bad ki lad pathai khubor.
Kane ka jingkren u Myntri Rangbah ka Jylla kala mih halor ka jingpyrshah bad jingbyrngem jong ka Khasi Hills Autonomous District Council (KHADC) bad ki Khlieh Nongsynshar ban leit mudui sha Ïingkashari ïa ka soskular pynbeit pud (Memorandum of Understanding) bala iasoi hapdeng ka Meghalaya bad Assam, haba kam ba katto katne ki jaka na ki 5 tylli ki Hima la pynhap jubor sha Assam.
“Ka KHADC bad ki Khlieh Nongsynshar ki don ka hok ban ieng hala ka jong ka nongrim bad lada ki kwah ban leit sha Ïingksshari ki lah ban leit namar ka Ïingkashari hi ka don ban bishar ïa kum kine ki kam. Hynrei nga kren shai ba kaei kaba ngi leh ka dei beit haba buh hakhmat ïa ka jingmyntoi jong uba bun balang” ula ong.
U Conrad ula ïathuh ba ka Sorkar Jylla kam shym la let klet ïa ki District Council bad Khlieh Nongsynshar haka jingiasyllok ïa kane ka kam kynthup ha ka kyrdan jong ki Regional Committee haba ong ruh ba baroh ki dei kiba la don bynta lang ha ka jingïakren pynbeit pud.
“Ngam ong ba ki kot ki sla, ki map bad ki pud ki sam ki Hima kim dei kiba donkam, hynrei kaei kaba ngi pyrshang ban leh hangne ka long ban wad ïa ka lynti ban ïapynbeit noh. Kum kane ka kam kaba jwat bha, yn ym lah ban pynbeit tang da kaba buh halor miej ïa ki kot ki sla na baroh arliang mamla. Ka Assam kan kham don bun ki kot ki sla, ki map ban ïa ngi ban kam trai ïa ki jaka” ula bynrap.
U Conrad ula ong ba ka jingpynneh ïa ka Status Quo kam dei satia ka jingïapynbeit haba ong “Ta ka daw, ngi hap ban don ka nongrim, ngi la ieng ha ka nongrim bad pynïaid shakhmat ïa ka kam haba buh hakhmat ïa ka jingbha jong baroh lang namar kan poi beit ka por ba ngi donkam palat ïa ka lynti ban pynbeit noh ïa kane ka kam”.
Haba pynpaw ba ka Sorkar Jylla kam lah ban shu peit ïa ki paid Khappud kiba la mad ïa shibun ki jingeh la bun phew tylli ki snem, u Conrad ula ong “Namar kata, ngi la shong bun tylli ki jingïalang bad hadien ka jingiatrei shitom ngi la lah ban iasoi ïa ka soskular pynbeit pud ha ka jingiadonlang u Myntri kam Pohïing ka Ri. Ngi kyrmen ban lah pyndep noh sa ka kylla kaba ar khnang ba ngin lah ban pruid dak noh ïa u pud u sam ba thikna”.
