“Ngin ym klet shuh ïa ki matti u Bah S. Kharlyngdoh, Deputy Commissioner barim ka West Khasi Hills District” ong ki nong Mawphanlur

Nongstoiñ, Jylliew 3: Ka shnong Mawphanlur kaba don ha kliar jong ki lynter lum Mawthadraishan ka dei ka shnong kaba itynnad haduh katta katta, khamtam eh hadien ba ka sorkar ka la ithuh ïa ki jaka kiba hap hapoh u pud u sam jong katei ka shnong kum ki jaka jngoh kai. Ka jingithuh jong ka sorkar ïa ki sawdong saw kum ka jaka jngohkai ka dei ha ki snem ba u bah Silvestar Kharlyngdoh u dei u Deputy Commissioner jong ka West Khasi Hills.
Ha kaba ïadei bad ka jingpynrung jong ka sorkar ïa ka Mawphanlur ha ka thup kyrteng jong ki jaka jngohkai, ki paitbah jong katei ka shnong ryngkat ki nongpynïaid jong ka Mawphanlur Tourism Development Society, haba ïakren bad u nongthoh khubor, ki la ong ba kin ym lah ban klet lano lano ruh ïa ki matti kiba u Bah Silvestar Khar lyngdoh, u la leh na ka bynta ka jingmyntoi jong ki paitbah nongshong shnong bad ki khun ki ksiew pateng la pateng, ha kaba u la lah ban ai jingmut ïa ka sorkar lyngba u Director jong ka Tourism Department, ba kan kan mang pisa na ka bynta ban shna ïa ki lynti ïaid kjat, ki pung, ki jaka sah jong ki nongwan jngohkai, ban siang rong ïa ka surok naduh Markasa bad kiwei kiwei ki kam ba bha kiba long ki jingmyntoi na ka bynta ki paitbah nongshong shnong.
Haba ïakren bad kiwei pat ki nongshong shnong jong ka West Khasi Hills, ki la ong ba ka jingdon jong u bah Kharlyngdoh kum u Deputy Commissioner, ka la ai jingmyntoi ym tang ïa ka Mawphanlur hynrei ïa ka dewlynnong Nongkhnum kaba dei ruh kawei na ki jaka jngohkai kaba itynnad hapoh ka District. Ha Nongkhnum ruh ki jaka sah, ki jaka shongkai pyngngad, ki lynti ïaid kjat, ka jingkieng simpyllieng ha Weinia bad kiba bun ki bynta ka sorkar ka la ai ha ka por jong u.
Nalor kata kiwei pat ki kam kiba pynsah nam ïa u ki dei ki Village hat lane ki ïing ban shong die jingdie ha ki sngi ïew, kawei ha Langdongdai bad kawei ha Langpih ki dei kiba la ïoh ban shna da ka jingtrei shitom jong u. Nalor kata ki la ong ba haba ïa nujor ïa ki Deputy Commissioner baroh kiba la wan ban shimti ïa ka kam ha West Khasi Hills, u bah Kharlyngdoh u la dei u ba wan hakhmat eh, ha kaba pyntrei kam hok ïa ki jingïarap kiba ka sorkar ka la mang na ka bynta ki paitbah.
Katto katne ngut ki rew rangbah ki bym kwah ban pynpaw kyrteng ïalade ki la ong ba ha ka jingtip jong ki, uwei pat u Deputy Commissioner jong ka West Khasi Hills, u ba bit ba biang bha bad u ba pyntrei kam hok ïa ki jingiarap jong ka sorkar sha ki paitbah ka District u dei u Arunkumar Kem bhavi (IAS). Hynrei na ka daw jong ka jingtrei smat bad trei kam hok jong u, ki riew saiñ pyrthei kiba bishni ïa u ki la pynkynriah kam khlem pat dei por. Namar lada don ma u kum u khlieh ka District kin ym ïoh lad ban pynrungkam sop sop ïa ki briew jong ki.
Nalor kata ki kam jaboh ba lai phew jait kun ym ïoh lad ha ki tnad treikam sorkar bapher bapher hapoh ka district. Ki la ong ruh ba lada phai ha ki Deputy Commissioner kiba don naduh u snem 2018 haduh mynta lei lei, ki la shu shong tang ban ym thylli ka shuki hynrei ki kam te imat ki sah hajuh shi hajuh.