Ngin ym ïateh lok, ngin ïakhun marwei ha ki 29 tylli ki seat ha GHADC election: Pala

Shillong, Rymphang 12: Ka Congress kaba la duh noh ïa ki MLA hapoh ka jylla, mynta kala pynkhreh tyngeh ban ïakhun na baroh 29 tylli ki seat ha kane ka elekshon ban wan jong ka Garo Hills Autonomous District Council (GHADC), ha kaba u President ka party u bah Vincent H Pala u la pynbna ba kin ïaid marwei khlem kano kano ka jingïateh lok.
“Ka party kan ïakhun beit na baroh ki 29 tylli ki seat.Ngim don kano kano ka jingïateh lok bad kiwei ki party, ngin ïakhun marwei ha kane ka elekshon ban wan”, la ong u bah Pala haba kren sha ki nongthoh khubor ha ka sngi Palei.
U la pyntip ba ka party ka la ïoh pdiang haduh 67 tylli ki aplikeshon na kiba kwah tiket, ha kaba kawei ka la dep ban weng noh bad kawei pat ka la khmih lynti, kaba sah sa 65 ngut ki kyrtong ki ban neh ha ka rai khatduh.
“Ngin sa pynbna ïa ki kyrtong ha ka khyllipmat ba ka sorkar ka pyntip bad pynbna ïa ka elekshon – kata ka dei ka rukom treikam kaba ju long ha ka party”, la ong u Pala.
U heh ka Congress u la pynpaw ruh ïa ka jingshaniah ha ka jingpynkhreh jong ka party, da kaba ong, “Ngi la pynkhreh (ban ïakynduh ïa ka elekshon). Ki briew jong ngi ki don ha madan bad kyrmen ba ngi dei ban leh bha.”