Ngin ym ailad ban den ïa ka projek bording ha Wah Khri, ong ki 51 shnong ka thaiñ Kyrshai

Nongstoiñ, Naitung 11: Ki nongïalam jong ka Assam Meghalaya Joint Protection Committee ryngkat ki paitbah jong ki sanphew wei tylli ki shnong, ba kynthup ïa ki shnong Khasi, Garo bad ki Rabha kiba don ha ka thaiñ Kyrshai ba la lam khmat da ka FKJGP Rambrai Circle, ha ka sngi Thohdieng ki la ïakynduh ïa u bah Garod L.S.N. Dykes Deputy Commissioner ka West Khasi Hills, ban kyrpad ïa u ba un pynsngew sha ka sorkar, ba kan pynsangeh noh shisyndon ïa ka jingthmu jong ka sorkar Assam, ban den ïa ka wah Khri na ka bynta ban pynmih bording.
Ka jingleit ïakynduh jong ki ïa u Deputy Commissioner ka long hadien ba ki la ïohi ha ki lad pathai khubor, ba ha ka 2 tarik Jylliew, u Himanta Biswas Sarma Mynri Rangbah ka jylla Assam bad u Conrad Kongal Sangma Myntri Rangbah ka Meghalaya, ki la pynlong ïa ka jingïakynduh lang ha Dispur ban ban ïakren halor ka jingthmu ban pynbeit ïa u pud u sam hapdeng ki ar jylla bad ha katei ka jingïakynduh lang, ki la ïakren ruh halor ka mat ban den ïa ka wah Khri kaba la tip kum ka Kulsi dam project na ka bynta ban pynmih bor ding.
U bah Albert Nonglang President ka AMJPC bad u bah Rajani Boro u nongïalam ba hakmat eh jong ki Boro bad Rabha, haba ïakren bad ki lad pathai khubor hadien ba ki la mih na kamra u Deputy Commissioner, u la ong ba hadien ba ha katei ka jingïakren jong kitei ki Myntri Rangbah ki la ïakut ba lada ka sorkar Meghalaya kan shah ïa ka Assam ban den ïa ka wah Khri, ïa ka jingmih na katei ka dam kin ïa sam mar ryngkat kata 50% sha ka Assam bad 50% sha ka Meghalaya.
U bah Nonglang u la ong ruh ba dei hadien ba ki la ïoh jingtip ïa katei ka jingïakut jong ki, ba ki paitbah katei ka thaiñ naduh ki Khasi, Garo, Rabha bad Boro ki la khihwin biang sa shisien, namar ka jingsheptieng ïoh kin kylla phetwir bad kin duh noh ïa ki jaka ki puta, khamtam ïa ki jaka rep jaka riang, ki bri kwai bri tympew kiba dei ki païa bah kiba kyrshan ïa ka kamai kajih, ka ïoh ka kot bad kiwei kiwei.
U bah Rajani Boro pat u la ong ba naduh ba ki la tip ïa ka jingïakut jong ki Myntri Rangbah jong ki ar jylla, ban sdang pyntrei biang ka Kulsi dam ki paitbah Rabha bad Boro ki la duh thiah dem. Namar ki la khuslai ba lada katei ka jingthmu jong ki ar ngut ki Myntri Rangbah kan urlong, da ki phew hajar ki paitbah kin hap ban phetwir. U la ong ruh ba halor ka jingpyrshah ïa katei ka jingthmu ki la leit ban ujor ruh sha u Deputy Commissioner jong ka Kamrup District.
Ha kaba ïadei bad katei ka Kulsi Dam jong ka sorkar Assam, naduh mynshuwa eh ka sorkar Assam ka la aiti ha ka Bramaputra Board ba kan leit thew leit woh ïa ka jaka ban tei ïa ka dam. Hynrei ki paitbah ki la khih buk ban pyrshah kumta ka la hap ban pynsangeh noh.
Nalorkata, hadien katto katne snem ka sorkar Assam ka la phah biang ïa ki nongtrei jong ka Brahmaputra Board ban leit thew leit woh ïa ka jaka ban tei ïa ka dam, ha kaba ki nongtrei ka Board ki la leit biang bad ki la dep ban thew.
Kaba sah ka long satang ban wanrah ïa ki nongtrei, hynrei ha utei u snem ruh ka jingthmu jong ka Bramaputra Board ka la pulom noh, namar ba u (L) bah Hopingstone Lyngdoh ryngkat u (L) Rev P.B.M Basaïawmoit, ki la hiar sha Kyrshai bad lum ïa ka jingïalang paitbah bad ki la beh krad syndon ïa ki nongtrei jong ka Brahmaputra Board.
Watla katta ruh hadien katto katne snem kata ha u snem 2012-13, ka sorkar Assam ka la pynkhie im biang ïa katei ka jingthmu ban pyntrei biang ïa katei ka project. Hynrei ha utei u snem ruh u (L) bah Hopingstone Lyngdoh ryngkat u bah K.P.Pangñiang MLA barim ka Rambrai Jyrngam, ki shym la ailad satia ba ka sorkar Assam kan pyntrei ïa katei ka project bad ha utei u snem ruh, ka jingthmu ban den ïa ka wah Khri kam shym la urlong.
Mynta pat ka sien pat wat la ki ar ngut ki Myntri Rangbah ki la dep ïakut ban pynurlong ïa katei ka project, hynrei ki paitbah kim shah satia bad ha kane ka kynti lada ka sorkar Assam bad ka sorkar Meghalaya kim sngap ïa ka sur jong ki paitbah jong ki sanphew wei tylli ki shnong, ka jingïakhih kaba jur ka lah ban mih ha baroh ar tylli ki jylla.
Kumjuh ruh ka jingpyrshah ban tei ïa ka Kulsi dam project, ka dei kaba la ai jingkyrshan da ki sengbhalang kum ka FKJGP, KSU na Meghalaya bad na Assam pat la ai jingkyrshan pura da ka All Assam Student Union, All Rabha Student Union, Boro Student Union, Garo Student Union Kamrup district zone, Garo National Council Kamrup district, All Rabha National Council Kamrup district zone, Garo Women Council Kamrup district zone, Sixth Schedule Demand Committee Kamrup district, All Assam Bengalee Youth Student Federation Kamrup District Committee, All Rabha Sahitya Sabha Kamrup district, All Assam Gorkha Student Union Kamrup district, All Assam Koch Rajbanshi Student Union Kamrup district, All Assam Student Union Chaygaon Anchalok Committee, All Assam Tribal Sangha Bongaon Ancahlok Committee, Khilanjiya Adhikar Sangram Samittee Assam No Amata Unnayan Committee, Christian Forum Kamrup District Committee bad kiwei kiwei.