“Ngin sei kyrtong ha baroh lai tylli ki Constituency ha West Khasi Hills” : D. D. Sohphoh

Nongstoiñ, Jymmang, 14: Watla ka Election ban jied ïa ki nongmihkhmat sha ka Ïingdorbar Thawaiñ ka jylla ka dang shim por, hynrei ki seng saiñ hima ki la sdang ban pynpaw kyrteng ïa ki kyrtong ki ban iakhun ha katei ka election. Na ka liang ka Bharatya Janata Party jong ka West Khasi Hills Mandal ruh ka la sdang ban tur sha kylleng ki jaka ban pynshai sha ki paidbah ïa ki mat treikam jong ka party, khnang ba ki paidbah nongshong shnong kin nang pynshong nongrim bad sngewthuh kumno ban khring ïa kiba bun ba lang sha ka party.
Ha kaba ïadei bad ka jingsdang jong ka party ban leit ïakynduh ïa ki nongshong shnong, u bah D.D.Sohphoh uwei na ki nongïalam ba hakhmat duh jong ka party ha West Khasi Hills haba ïakren bad u nongthoh khubor, u la ong ba watla ki paidbah ba bun ba lang ha West Khasi Hills kim pat da phai khmat than sha ka BJP. Hynrei kumba ka long mynta ki la don bun ki rangbah bad ki samla kiba don ka jingthmu ban rung sha ka party bad ban pynkhlaiñ ha ka elekshon ban wan.
U la ong ruh ba ki don tang ar tylli ki mat ba ki paidbah ki ju kynnoh ïa ka BJP na ka por sha ka por, da kaba ong ba ka BJP ka dei ka party kaba khang ban bam doh masi bad kaba ar ka long ba ka BJP ka don jingthmu ban pynkylla Hindu lut ïa baroh ki nongshong shnong ha poh ri India. Hynrei, watla katta ruh u la ong ba hadien ka jingpynshai jong ki nongïalam, kiba bun ha kine ki sngi ki la sdang ban sngewthuh.
U bah Sohphoh u la ong ruh ba wat la kiba bun ki paitbah kim pat da sngew-thuh shai ïa ki mat treikam jong ka party, hynrei na ka liang ki nongkitkam ka West Khasi Hills kin nangïai trei shitom ban pynsngew-thuh ïa ki, namar ka party ka la dep rai ba ha ka election ka ban long ha u snem ban wan ha West Khasi Hills, ka la dep pynthikna yn pynïeng kyrtong ha baroh lai tylli ki Constituency kata ha Mawshynrut, Rambrai Jyrngam bad Nongstoiñ.
Hynrei kumba long mynta ïa ki kyrteng jong ki kyrtong na kitei ki lai tylli ki Constituency, ym pat lah ban ïathuh ïa ki kyrteng jong ki kyrtong namar ka por kam pat dei. Hynrei ka jingpynkhreh jong ki, ka la nangïaid shakhmat bad ki rangbah kiba don jingthmu ban ïa aireng na ka BJP ha kitei ki lai tylli ki Constituency ruh ki dei kiba la biang pura la ka long ha ka jingnang jingstad, ka jingshemphang bad ha ka jingdon jingem.
U la ong ruh ba lada ki paidbah ki sngewthuh, ki dei ban peit ïa ka resol ha ka election ha Uttar Pradesh, Manipur bad Goa. Kumba ka long mynta, wat ha ka M.P Election kaba long ha u snem 2024 ha ka ri India baroh kawei, yn ym pat don mano mano ba lah ban pynliem ïa ka BJP bad u Narendra Modi un dang long hi u Myntri Rangbahduh ka ri. U la ong ruh ba wat ha ka election 2023 ha kane ka jylla ruh ka jingjop MLA na ka BJP kan kiew hynrei ym pat lah ban ong katno ngut.