Shillong, Nailur 07: U Myntri Rangbah ka jylla u Conrad Sangma ha ka sngi Balang u la pynpaw ba ka sorkar jylla kan pyrshang lut la ka buit ka bor ban ïoh biang ïA ki jaka kiba la pynhap sha ka jyla Assam kiba la ju tip kum ka Block-I namar kiba bun na ki nongshong shnong jong kane ka thaiñ ki pynpaw ba ki kwah ban don beit bad ka Meghalaya.
“Kumba phi la ïohi ba ha ka wat ba nyngkong jong ka jingpynbeit pud ka Tarabari Sector ka sorkar barim kam shym la kam ba ka dei ki bynta jong ka jylla hynrei namar ha ka jingleit jurip ki nongshong shnonhg ki pynpaw ba ki kwah ban don sha ka Meghalaya ba ka sorkar Assam ka ai lad ba kito ki shnong kin wan sha ka jylla Meghalya” ong u Myntri Rangbah haba kren sha ki lad pathai khubor.
U Myntri Rangbah u la ong ba kumba la thew mawser ïa ka jingwan ki shnong ne ka jingleit na ka Meghalaya sha Assam ne na Assam sha ka Meghalya ha ka History, ka jingmon ki nongshong shnong u kyrmen skhem ba kan long ruh kumta ha kane ka wat kaba ar jong ka jingpynbeit pud.
“Kane ka wat kaba ar kaba kham jwat bad kyllaiñ hynrei ngin pyrshang ïA kaba bha tam na bynta ka jingmyntoi ka jylla. Ki la don ki nongïalam shong na kine ki thaiñ kiba wan ban ïakynduh bad nga ban ïakren ba ki kwah beit ban don bad ka Meghalaya” u la ong.
U la ong ba na ka liang jong u pat um lah ban ai ka jingkular ba kan wan beit sha ka jylla namar ka dei ka kam kaba hap ïakren lang bad kawei ka jylla hynrei “nga kular ban ngan pyrshang ban pynïoh biang ïa kine ki shnong da ka buit bad ka bor baroh” u la bynrap.
