Shillong, Naiwieng 01: U General Secretary ka Hynñiewtrep Youth Council(HYC) u Bah Roykupar Synrem u la ong ba ki dkhot ki seng bhalang kiba don lang ha ka Save Hynñiewtrep Mission ba kythup ïa ka HYC, ka Hynñiewtrep Achik National Movement (HANM), East Jaintia National Council(EJNC) bad ka Confederation of Ribhoi People(CoRP) kin leit ban pynthut ïa ki jingïalang jong ka sorkar ne ki party kiba ki myntri sorkar jylla kin wan shim bynta bad kin leit ruh ban kylli ïa aiu na ka liang jong ki ki la leh ban pynurlong ïa ki mat bad ki jingangnud kiba ki paidbah ka jylla ki angnud.
Haba kren ha ka jingïalang lyngkot hadien ba la wan ïa kynduh bad u Mynti ki kam poh iing u bah Lahkmen Rymbui na ka liang u bah Roykupar u la ong ba ha ka jingïakynduh ka long kaba ym mih soh eiei ruh namar na ka liang jong u um lah ban shim ïa kino kino ki rai kiba ki seng bhalang ki dawa hapoh ka Save Hyniewtrep Mission.
“Nangne sha khmat na ka liang ki dkhot ka kynhun ha kylleng ki jaka kiba doon ki prokram sorkar kiba u Conrad, u bah Prestone bad kiwei ki myntrei sorkar ki wan shim bynta ngin leit ban pynthut ïa ka jingïalang jong ki bad ban buh jingkylli ruh aiu ki la leh halor ka Resolution ban pynïoh ILP ha ka jylla, ka Resolution ban ïoh jingithuh noh ka ktien Khasi ha ka Khyrnit ba phra ka riti synshar bad kiwei ki mat”, u la ong.
Haba kren halor ka jingshah khang lynti jong ki ha ki bor pulit ba leit sha Secretariat ban leit pynkynmaw ïa ka sorkar bad ki myntri halor kane ka jingdawa jong ki namar ka jingpynjari ka sorkar lyngba ka jingpynbna na ka DC ïa ka kyndon 144 CrPC kaba la khang ban ïalum paidbah bad ïa ïaid paidbah ha sor Shillong khlem da ïoh jingbit shuwa na ki bor stynshar district, u Bah Roykupar u la ong ba kaei kaba ka DC ka la leh ka long kaba ym dei kaba shong aiñ namar u paidbah haba u kwah ban leit ïa kynduh bad ki myntri ne ki nongmihkhmat kiba ki la dep jied kim donkam jingbit satia na ka DC.
U la ong “Ngi kwah ban kylli ïa kane ka sorkar naduh mynno ka don ka aiñ ba ngin donkam jingbit ban leit kynduh ïa ki nongmihkhmat kiba ngi la jied bad ka DC kam dei ban shah ïalam bakla ha ka sorkar halor kane” bad bynrap “lada ka sorkar bad ki nongmihkhmat kiba ngi la jied kim lah ban shna aiñ ka dei ka kamram jong ngi ban pyntreikam ïa ki aiñ kiba ngi angnud”.
