Ngin pynlong ïa ka Nongkrem Constituency ka Model Constituency hapoh 5 snem : Sniawbha

Shillong, Risaw 24 : U Myntri ka sorkar jylla ba dei ruh u heh ka NPP ha Meghalaya, Bah Sniawbhalang Dhar ha ka sngi Nyngkong u la ong ba kin pynkylla ïa ka Nongkrem kum ka model constituency lada jia ba ki paidbah katei ka thain ki pynjop ïa u Bah Dasakhiat kum u MLA ha ka elekshon 2023.
Utei u rangbah haba kren ha ka jingïalang jong ka NPP ha Nongkrem u la ong ruh ba ka Nongkrem ym dei ba kan ïoh tang arngut ki MLA kumba la ong da u kpa jong u Dasakhiat, Bah Ngaitlang Dhar hynrei kin ïoh syndon haduh lai ngut ki MLA kata kynthup ïa u ruh ban ïarap lang ïa katei ka constituency.
“Kane ka long thik kumba leit thied jaiñ na Khyndailad thied kawei ïoh ei ar tylli,” la ong shuh shuh u Bah Sniawbhalang uba dei ruh ha kajuh ka por u Pakhynnah jong u Dasakhiat bad u para jong u Bah Ngaitlang Dhar.
Nalorkata, u la ong ruh ba kum ka ïing hi, kim kynnoh ïa ki MLA barim la ka long ïa u Bah Ardent ne ïa u Bah Lambor ba kim trei kam, hynrei ki kwah ba u Bah Dasakhiat un trei khambha bun shah ïa kaei kaba ki trei ma ki ban pyntikna ba ka jingmyntoi bad ka roi ka pa kan long salonsar ïa baroh.
Shwa kane, u Bah Sniawbhalang u la ïathuh ruh ba ka NPP long katba long kan dang wan biang ha ka bor synshar namar katkum ka jingkhein kaba ki ïoh, ka party kan ïoh ym duna ia ka 37 seat, kata 15 seat na rilum Garo bad ym duna ïa ka 22 seat pat na rilum Khasi bad Jaiñtia Hills.
Ha katei ka jingïalang kaba long ha Nongkrem la donlang ruh naduh u President Rangbah jong ka NPP Meghalaya Dr. WR Kharlukhi uba la pynskhem ïa ki nongkitkam ba thymmai jong ka NPP Nongkrem Block.