Shillong, K’Lyngkot 20 : U President jong ka United Democratic Party (UDP), Bah Metbah Lyngdoh ha ka sngi Nyngkong u la kam ba ka party jong u kan pynkyndit lut ïa kiwei pat ki party ha kane ka elekshon MDC kaban sa long ha ka 21tarik u Rymphang la ka long ha ki constituency jong ka KHADC lane ha JHADC ruh kumjuh.
Ïa kane u la pynpaw haba kren bad ki lad pathai khubor hadien ka jingpyllait paidbah ïa ka thup kyrteng kaba lai jong ki kyrtong kiban aireng ha kane ka elekshon MDC na KHADC bad ruh na JHADC.
“Nga kwah ban pyntip ïaphi ba kane ka kynti ka long kaba kham pher bad ngi sngew donbok haduh katta katta ba ngi ïoh ïa ki kyrtong kiba tbit bha bha kiba dei ruh ki kyrtong kiba don jingkyrmen bha ban jop,” u la ong haba kren bad ki lad pathai khubor.
Ha kajuh ka por u ong ruh ba kum ka party kan trei shitom ban pyntikna ba kin ïoh ban thaw ïa ka Executive Committee ba thymmai la ka long ha KHADC bad kumjuh ruh ha JHADC.
“Dei na kane ka daw ba ngi da bishar bniah bha ïa ki kyrtong bad kata kadei ka daw kaba la pynslem khyndiat ban pynbna ïa ki kyrtong. Watla katta ngi la kren shai bha baki kyrtong ha kane ka kynti kam dei tang ba shu sei kyrtogn hynrei ba ki don ruh ka jingkyrmen ban poi sha ka thong.”
U Bah Metbah u la ong ruh ba ka rai jong ka party bad ka HSPDP ban ym don ka jingïatreh lok shwa ka elekshon MDC ha ka lama jong Regional Democratic Alliance (RDA) kan ym jingktah ei ei ha kane ka elekshon MDC kaban sa long shen.
Ki kyrtong kiba la pynbna ha kane ka sngi ki kynthup ïa u MLA ba mynta ka Sohiong Bah Synshar Kupar Roy Lyngdoh Thabah, nangta u Bah Anthony Khongwang uban aireng na Nongshken constituency bad u Bah Lee Trevor S Bareh na Jirang.
Katba ha ki constituency jong ka JHADC pat la pynbna ba ka party kan pynieng da u Bah Meiowan Pasi na Nangbah Mihmyntdu.
Haduh mynta ka UDP ka la pynbna 22 ngut ki kyrtong na bynta ki constituency jong ka KHADC bad 17 ngut ha ki constituency jong ka JHADC.
La ïathuh ruh ba ïa ka thup kyrteng kaba khatduh jong ka party yn sa pyllait ha kine ki khyndiat sngi ban wan.
