Shillong, Nailur 18 : Ha ka sngi Balang ka 18 tarik Nailur 2024, ka Kynhun ki nongniah kali Tourist na ka jylla hapoh ka shatri jong ka All Khasi Meghalaya Tourist Taxi Association (AMKMTTA) ka la pynlong da ka jingïalang pynrem ïa ka sorkar bad ruh ban shim rai kumno ban leh hadien ba ka sorkar kam shym la khot ïakren wat hadien ba ka kynhun ka la ïakhih da ka Black Flag Week.
Ha kane ka jingïalang la wan ban ïashim bynta da ki trai kali ki nongñiah kali tourist na ki jaka bapher bapher ka jylla.
U Bah Ricaldinus Dohling President ka synjuk haba ai jingkren u la kynthah tyngeh ïa ka sorkar jylla bad ïa ki myntri sorkar ki bym patiaw ïa ki jingeh jingjynjar bad ki jingdawa ka seng.
Shuh shuh u la ong ba lada ka sorkar kam sngap ïa kane ka jingïakhih mynta ka na ka liang ka kynhun kan sa pynlong ka jingïakhih kaba kham jur ban pynkhynñiuh ïa ki Myntri sorkar bad ai por shi taïew ïa ka sorkar da kaba kan sa phah shuwa da ka shithi sha u Myntri Rangbah ka Jylla.
