Ngin pynjop donburom ïa u Bah Teibor kum u MLA ka Mawlai ha u 2023: Embhah

Shillong, Nailur 03 : U MLA barim ka Mawlai, Bah Embhahlang Syiemlieh ha ka janmiet sngi Saitjaiñ u la ïalam da ki spah ngut ki nongïalam bad nongkyrshan ba radbah jong ka UDP Mawlai ban pynïasoh noh sha ka NPP kaba la wan ban pdiang burom hi da u National Vice President ka NPP, Bah Prestone Tynsong ba dei ruh u Symbud Myntri Rangbah ka jylla.
Ha katei ka jingïalang pdiang sngewbha ïa kitei ki nongïalam ba radbah ka UDP la pynphuh shuh shuh da ka jingdonlang naduh u President ka Meghalaya NPP, Dr. WR Kharlukhi nangta u Working President Bah Don War, u MDC ka thain bad kyrtong MLA ka NPP na Mawlai u Bah Teibor Pathaw nalor ki nongïalam jong ka Women’s Wing bad Youth Wing.
U Bah Embhah haba kren ha katei ka jingïalang u la ong ba u la ïai neh ha ka party la 15 snem mynta bad u la u jop ruh kum u MDC bad MLA na katei ka party. U la ong ba dei haduh mynta u snem khamtam ha ka jingpynkhreh na ka bynta ka elekshon MLA ba la sdang mih ki jingkylla ha katei ka party.
“Bun ki nongïalam jong ka party ki la shah leh kiar lut ha ki nongïalam kiba thymmai,” u la ong da kaba ïathuh ba watla ïa u kitei ki nongïalam ba thymmai kim da nud eh hynrei um lah pat ban shah ba ki nongïalam kiba la trei borbah na ka bynta ka party kin shah ïaid lait lut ha kitei ki nongïalam ba thymmai.
Kumta u la ong ba hadien kane ki la pynsngew sha ki bor bahalor jong ka party tangba ym don satia ban patiaw ïa ki kumta, da ka jingïasyllok lang da baroh, ki la shim ïa ka rai ban resaiñ noh na ka party baroh. “Hynrei mar ïa dep resaiñ baroh baroh ki ïa phone ban ong ban ïa pynbeit noh. Wat 48 kynta shwa ban wan pynïasoh sha ka NPP ruh ki dang ong ban wanphai biang sha ka party,” la ïathuh shuh shuh u Bah Embhah.
Shuh shuh u ong ruh ba nangne shakhmat kin trei borbah ban pyntikna ba u kyrtong jong ka NPP, Bah Teibor Pathaw un jop donburom ha ka elekshon MLA kaban sa long shen khnang ba un long u MLA ba thymmai ka Mawlai.
Na ka liang u Bah Teibor bad ki nongïalam ka NPP Mawlai ki la pynpaw ïa ka jingkmen kaba khraw halor katei ka jingwan pynïasoh jong katei ka kynhun u Bah Embhah bad ong ba kin ïatrei lang kum kawei ka kynhun ban ïoh ïa ka jingjop kaba donburom ha ka elekshon ban wan.