Ngin nym ailad ïa ka Investment Meghalaya Authority ban pynkylla Industrial Estate ïa ka jaka sorkar ha 13mer, Byrnihat

Nongpoh, Jylliew 20: Ka Ri Bhoi Youth Welfare Organization (RBYWO) kum ka kynhun seng bhalang na Ri Bhoi ka la shim ïa ka rai ba kan nym ailad da lei lei ïa ka sorkar jylla lyngba ka Investment Meghalaya Authority ban pynkylla sa ïa ka jaka jong ka Soil and Water Conservation bad jong ka tnad Agriculture kaba don ha 13mer Byrnihat kum kata ka Industrial Estate.
Kane ka seng ka la mih ban pyrshah halor kane ka jingthmu ka sorkar lyngba ka Investment Meghalaya Authority halor ka jingthmu ban wan rah biang ïa kata ka Industrial Estate da kaba kam ban kyntiew ïa ka ioh ka kot jong ka jylla, ka dei hadien ba la mih ha ki lad pathai khubor ba ka sorkar jylla lyngba ka Investment Meghalaya Authority ba la khlieh da u Vijay Kumar kum u CEO ka la ai jingthoh sha ka tnad Soil and Water Conservation bad sha ka tnad Agriculture ban pan ïa katei ka jaka kaba heh kumba 137 akra ha 13mer Byrnihat na ka bynta ban pynkylla noh sha kata ka Industrial Estate
Haba ïa kren sha ki lad pathai khubor, u President ka RBYWO, u Bah Ban Kharnaior, u laong ba ka seng RBYWO ka pyrshah jur ïa kane ka jingthmu ka sorkar ban pynkylla Industrial Estate ïa katei ka jaka kaba don ha 13mer, Byrnihat bad kumba long mynta katei ka dei ka jaka ba la pyndonkam da katei ka tnad sorkar kaba peit kyrpang ban kyntiew ïa ka rep ka riang bad ïa ki jingmyntoi jong ki paidbah bad kumno yn pynkylla sha kata ka Industrial Estate ha kaba wat kiba la don lypa ruh kim ai jingmyntoi satia ïa ki paidbah.
U la ong ruh ka jylla Meghalaya ka la don lypa kata ka Industrial Estate ha Umïam bad ha Byrnihat bad kaei kaba ki paidbah ki mad ka dei tang ka jingduhnong kaba ktah ïa ka koit ka khiah, ki jingjaboh ba mih na kitei ki Karkhana bad kaba ktah ruh ïa ka mei mariang na ka daw ka jingmih ki jaboh na kitei ki Karkhana bad mynta pat la thmu ban pynlong sa ïa katei ka jaka kaba ki tnad treikam sorkar ki la pyndonkam lypa na ka bynta ka jingbit jingbiang jong ki paidbah hi ha ka jylla.
Ka seng kan ïai pyrshah bad shuwa ba ka sorkr kan pyntreikam ïa katei ka jingthmu kala dei shuwa ban ai jingpynshai sha ki paidbah la katei ka jingthmu ka ai jingmyntoi neem ïa ki paidbah bad lada ka long hi kumba long ki Karkhana ha Umïam bad ha Byrnihat kam don jingmyntoi satia ha kaba khatduh ki paidbah ki dei tang ki nongshah ktah bad ka jingmyntoi ka leit sha kiwei kiba nabar kiba wan seng kam seng jam lyngba kita ki Kharkhana, ong u Bah Kharnaior.
U la pynpaw ruh ba ka seng ka hap ban budien la katei ka jingthmu ka sorkar la ka long shisha neem kaba ioh jingmyntoi ki paidbah bad kum ka sorkar shuwa ba kan leh ïa katei ka kama ka la dei ban ai ka jingpynbna paidbah bad ban batai ruh ïa ka jingmyntoi sha ki paidbah bad lada ka long shisha kaba ai jingmyntoi ïa ki paidbah bad kaba kyntiew shisha ïa ka ioh ka kot jong ka jylla kum ka seng kam don kano kano ka jingpyrshah, u la pynpaw.
Kum ka jingpyrshah ïa kane ka jingthmu ban pynlong Industrial Estate ha katei ka jaka ha Byrnihat, ka seng ka la dep ai ruh da ka jingthoh sha ka myntri ka tnad ka kam rep ka kam riang, ka Kong Ampareen Lyngdoh bad ruh sha u Director ka tnad soil and Water Conservation ka jylla ba kim dei ban ai ïa katei ka jaka bad ki dei hi ban pyntreikam ïa katei ka jaka kumba la pyntreikam baroh shi katta ban myntoi ki paidbah hapoh ka jylla, u la bynrap.