Shillong, Ïaiong 24 : U Myntri ka tnad Revenue and Disaster Management ka sorkar jylla, Bah Kyrmen Shylla ha ka sngi Palei u la ong ba ka tnad ka la pynap lypa bad pynkhreh bha khnang ban tehlakam ïa ki jingjulor kiba ju wan na ka jingshah lyngshop ha ki bor ka mariang kiba ju wan ha kane ka por slap.
Haba kren bad ki lad pathai khubor, u Myntri u la ong, “Ngi la ju ïohi ba ka Meghalaya ka dei ka jylla kaba ju sakhi man u snem ïa ki khubor kiba sngewsih khamtam haba dei ka aiom slap. Kumta mynta ka kynti, ki ophisar jongngi ki la pynkhreh bha ban pynap lypa khnang ba ynlah ban pynstet ïa ki bor jingïarap haba don kum kitei ki jingjia shah lyngshop mariang.”
U Myntri u ong ruh kaba kham kongsan eh kum ki para briew haba don kum kine ki jingjia shah lyngshop mariang kadei ka jingïarap mar kylliang.
“Donkam ruh ban long kiba phikir, kiba peitngor bad kiba ïarap mar kylliang haba don kum kine ki jingjia,” bynrap biang u Myntri.
Nangta u ong ruh ba ka Meghalaya kadei ka jaka kaba nalor ba ka jur slap kadei ruh ka lynti ïaid jong u jumai kumta, kum ki paidbah kim dei satia ban kheinsting hynrei ban long barabor kiba peitngor.
Da kaba pyntip ba ki bor sorkar bad na ka liang ka tnad ai jingïarap ki dei kiba la pynkhreh na bynta kino kino ki jingjia shah lyngshop mariang, hynrei u Myntri u ong pat ba kim lah ban tip ïa ki bor ka mariang lano kin wan bad ha kano ka jaka kan jia ka jingshah lyngshop.
“Na ka liang ka tnad ngin pyntikna ba ngin ai ka jingshakri kaba paka tam ïa ki paidbah ka jylla khnang ba ka jingduh ei ki mynsiem briew ha ka jingwan lyngshop ki bor ka mariang kan ym jia shuh,” u la ong. Kumban shu kdew hangne, ka jylla Meghalaya man u snem ka ju sakhi ïa ka jingduh kaba khraw la ka long ha ka liang ki iing ki sem, ki jingthung jingtep, ki jingkieng bad wat ki mynsiem briew tang shu poi ka aiom slap.
