Ngin ïai neh ha ka UDP, ym kumba la paw ha ki Social Media ba ki la shah pdiang bad u H.M. Shangpliang

Jyllep, ‘Nailar, 02: Ki nongkyrshan jong ka United Democratic Party (UDP) jong ka Jyllep Unit hadien ba la mih ha ki lad pathai khubor ki la pynpaw ka jingsngewsih bad sngewkyndit namar tang na ka daw ka don ka jingkhot jingïalang jong u bah H.M. Shangpliang, MLA ka Mawsynram Constituency uba la leit pynïasoh sha kawei pat ka party ha kaba u la kam syndon ïa kita kiba wan sha ka jingïalang ki la wan ban pynïasoh bad ai jingkyrshan ïa u na ka bynta ka elekshon 2023, hynrei em kam long kumta.
Na ka liang ki nongkyrshan jong ka party UDP na ka Jyllep Unit, haba kren ha ki lad pathai khubor, ki la pynpaw ba kum kane ka jingkam trai ïa ki briew khlem da pynshong nongrim bha ba kin long ki nongkyrshan jong u MLA, bah H.M. Shangpliang tang na ka daw ba ki wan sha ka jingïalang jong u, ka long kaei kaei ka bym lah ban pdiang namar ka la long kumba thok bad shu lamler.
“Ngi leit sha ka jingïalang namar u khot lyngba u myntri shnong ba un sam ki lad jingïarap, hynrei phewse ynda poi sha ka jingïalang ka long pat da khongpong namar u khlem ai ei ei pynban ha kaba kut jong ka jingïalang bad pynpaw ha ki lad pathai khuor u pynpaw pyrthei ba ki wan ban pynïasoh ban kyrshan ïa u”, la ïathuh ki paidbah nongkyrshan.
Namarkata, haduh mynta kine ki nongkyrshan jong ka party UDP kim pat don kano kano ka rai ban kyrshan ïa kiwei pat ki party ne ïa u kyrtong hynrei tang ïa ka UDP hapoh ka jingïalam jong u bah Ollan Sing Suiñ.
U bah Rockchestar Thongni, General Secretary jong ka UDP Mawsynram Circle haba pynpaw halor ka jingmih khubor ha ka 13 tarik u ‘Naitung, 2022 kaba ong, “Mih noh ki nongkyrshan ka UDP na Jyllep ban leit kyrshan ïa u bah H.M. Shangpliang” kane ka long ka khubor ba shu thok bad ka bym don nongrim. U la ong ba kane ka jingkam ka long kaei kaei ka bym lah ban pdiang da lei lei namar kumno tang na ka daw ba ki leit sha ka jingïalang ban pdiang ïa ki lad jingïarap na u nongmihkhmat ki la shah kam syndon ba ki dei ki nongkyrshan jong u??? u la buh jingkylli. Hooid! ki paidbah haba wan kat u nongmihkhmat ki don ka hok ban leit sha kano kano ka jingïalang, hynrei kim dei pat ban shim kabu halor ka jingwan jong ki, u la ong.
U la pynshai shuh shuh ba ymdei ba ki la shah pdiang sngewbha ha ka party kaba don ha ka liang ba don u bah H.M. Shangpliang hynrei ki nongkyrshan jong ka party UDP ki shah khot ha ka jingïalang lyngba u Rangbah Shnong jong ka Jyllep ha kaba u nongmihkhmat un ai ei ei ïa ki ne ai jingïarap la ka long ïa ki ‘riew kynthei ne ki longïing kiba duk, hynrei phewse ynda ki la poi ha ka jingïalang la paw syndon ba ki la dei ki nongkyrshan jong u bah Shangpliang.
Namarkata, na ka liang ki nongkyrshan jong ka UDP kiba la shah khot ha ka jingïalang jong u bah H.M. Shangpliang ki la kren da kaba shai ba ymdei ba ki la ieh noh ïa ka UDP hynrei ma ki kin ïai neh beit bad kin ïai long ki dkhot jong ka UDP bad kin ïai ïeng skhem ha la ka nongrim.