Shillong, Risaw 14 : Ka Nongïalam jong ka NPP kaba dei ruh ha kajuh ka por ka Myntri jong ka tnad ka Koit ka Khiah ka Jylla Dr. M Ampareen Lyngdoh ha ka sngi Nyngkong ka la ong ba ka party ka la pynkhreh bha na ka bynta ka elekshon shiteng samoi ha Gambegre bad kumjuh ruh na bynta ka elekshon MDC ha Rilum Khasi bad Rilum Jaintia.
Haba kren bad ki lad pathai khubor ka Myntri ka la ong ba ka NPP kadei ka party kaba la pynkhreh lypa ïalade na bynta baroh ki elekshon. “Kampher la kadei na bynta ka elekshon MLA lane ka elekshon MDC bad kumjuh ruh ka elekshon MP, kum ka party ngi la pynkhreh lypa na bynta ka elekshon,” ka la ong.
Da kaba kam ba ka NPP kan ïakhun tyngeh ban jop ïa ka elekshon shiteng samoi ha Gambegre, ka Dr. Ampareen ka ong ruh ba kin ïakhun bad trei borbah khnang ba kin ïoh ïa ka jingjop na ka bynta ban pynskhem shuh shuh ïa ka bor synshar ha ka jylla.
“Lada phi kylli ïanga katno persen ba ka NPP ka la dep ban pynkhreh na bynta ka elekshon ha Gambegre nga lah ban ong ba ngi la long 100 persen kiba la pynkhreh. Watla ngam pat leit dalade hi sha katei ka thaiñ hynrei la pyntip pat ïanga ba ngi don ha ka jingïakhun ha kane ka elekshon bad kumta wat khein sting ïangi ha kane ka jingpynkhreh,” ka la bynrap biang. Lah ban kdew hangne ba ka NPP ka la pynieng da ka kurim jong u Myntri Rangbah ka Jylla, ka Mehtab Chandee Sangma kum ka kyrtong ha kane ka elekshon shiteng samoi na Gambegre hadien ba u MLA jong kane ka constituency u Saleng A Sangma u la resain noh mar ïa shah jied kum u MP ka Tura.
