Nongstoiñ, Jylliew 26: Hadien ba ka kong Ampareen Lyngdoh myntri sorkar Meghalaya jong ka koit ka khiah ka la hiar sha West Khasi Hills, ban jurip ïa ki hospital bapher bapher kiba don ha Nongstoiñ kaba kynthup ïa ka MCH Hospital kaba don ha Civil rim, ka TB Hospital kaba don ha Nongstoiñ, ka Civil Hospital Nongstoiñ bad kiwei kiwei, katei ka myntri ka la ïoh ruh ban pynlong ïa ka jingïakynduh lang kaba kyrpang bad ki sengbhalang jong ka thaiñ.
Ha katei ka jingïalang la ong ba ki sengbhalang ki la ïatai sani bha haba ïadei bad ki tiar jong ka MCH Hospital kaba don ha Civil rim kaba ka sorkar ka la rah noh sha Mawkyrwat. La ong ba ka kong Ampareen ka la ong ba baroh ki tïar kiba dang sah ruh ym kit lut noh sha Mawkyrwat. Namar ba ki la shu sdang ban rim noh lada buh sah hajuh hynrei ka la kular ban ai noh da kiwei kiba thymmai hadien lai bnai.
Ha kane ka sngi tang Lai tylli ki sengbhalang ki la poi ban ïadonlang bad katei ka myntri kynthup ïa ka seng HYC West Khasi Hills District, ka seng HNYM West Khasi Hills bad seng Ri Khasi Sepngi Federation. Ki sengbhalang haba ïakren bad ki nongthoh khubor ki la ong ban mynjur ïa kata kaba ïakut bad yn ïai shah ban ap haduh 3 bnai.
