Ngim tieng ïa ki jingpyntieng Kohtympan kiwei, ka party Congress kan jop beit na baroh 5 constituency ha Ri Bhoi, ong ki Nongïalam

Nongpoh, Nohprah 10 : Ki nongïalam ka Congress party ha Ri Bhoi mynta ka sngi ki la pynpaw pyrthei ba kam tieng satia ïa ka jingpyntieng kohtympan kiwei ki party ba ka Party Congress ka la duh bor ha ka jylla, hynrei kum ki nongïalam kin ieng beit ha ka nongrim ka party ban shakri ïa ki paidbah bad ki sngewthuh shai ruh ba ka party congress ka don ha ka lynti ym tang ban jop na ki san tylli ki Constituency na Ri Bhoi bad ka don ruh ka jingkyrmen ba kan ioh ban bat ïa u lakam wat ban synshar ha ka jylla hadien ka election 2023 ha ka jylla.
Ki nongïalam bad ki kyrtong ka Congress naduh u Dr. Celestine Lyngdoh, u Bah Charles Marngar bad ka Kong Rona Khymdeit haba kren mynta ka sngi ha ka General Meeting ka Ri Bhoi District Congress Committee bad ha ka jingplie ïa ka ophis treikam ka seng ha Nongpoh, ki la ong ba ngim artatien ba kin jop na ki 5 tylli ki constituency ha Ri Bhoi bad kumba long haduh mynta ki paidbah ki dang phai khmat sha ka party Congress namar ba ka dei ka party kaba trei shisha na ka bynta ki paidbah.
Halor ka jingphet ki MLA ka Congress sha kiwei pat ki party, kitei ki nongïalam ka Congress na Ri Bhoi ki la ong ba kim sheptieng satia bad ki la don ki nongïalam kiba la mih bujli bad kine ki nongïalam ba thymmai ki ioh ïa ka lad ban trei shisha na ka bynta ki paidbah katkum ka thong jong ka party kaba ju trei na ka bynta ki paidbah.
Na ka liang kitei ki nongïalam ki la phla ruh baroh ki jingkren bein ïa ka party Congress ki dei tang ban ïalam bakla ïa ki paidbah bad lada ym dei kumta balei ki wan ban tyrwa ïa ki ban ïaleh election na ki party jongki bad dei namar ba kim kohnguh ïa ki jingtyrwa ki la bein la khoh ïa ki ba kum ki nongïalam kim kwah ban ïalam bakla ïa ki paidbah bad kin ieng ha ka nongrim ban shakri shisha na ka bynta ki paidbah.
La mih ruh ka jingkynnoh na ka liang kitei ki nongïalam ka Congress, da kaba ong ba ki paidbah ki tip kham bha ban bishar ha kane ka election 2023, namar kum ki paidbah ki la dep ban mad ïa ki jingeh kiba bun ha ka jingsynshar ka NPP ba la ïasoh lang bad kiwei ki party riewlum khamtam ka UDP kiba kam ba ki trei na ka bynta ka jaid bynriew bad na sha lyndet ki ïatrei ryngkat pat bad ka party BJP kaba u paidbah ka jylla da lei lei kin nym pdiang satia halor ki kam buittuh ka BJP kaba thmju ban wan rah kawei ka ri bad kawei ka niam.
Ki la pyni nuksa ruh kum ka Uniform Civil Code kaba dei kawei na ka matpdeng ba ka BJP ka kwah ban pyntreikam hapoh ka ri halor ka thong ban khniot ïa ki jaid bynriew barit paid bad kaba sngewsih ka long ba kita pat ki party na ka jylla kiba kam ba ki shakri ïa ka jaid bynriew ki ïa trei lang bad kane ka party BJP, ki la ong.
Ki la ther tyngeh ruh da kaba ong ba ka party Congress kan ioh ban bat ïa u lakam jong ka jingsynshar hadien ka election 2023, ka dei halor ka nongrim ba ki paidbah ki la ngiah ïa kane ka sorkar NPP bad la ïasoh lang bad kiwei ki party riewlum kum ka UDP, PDF bad HSPDP kiba kam ba ki trei na ka bynta ki paidbah bad ka kam kaba ki la pyni sha ki paidbah pat ka long da khongpong ha kaba haduh mynta ki paidbah ki don hapdeng ka jinglynniar kaba khraw ba ka jylla ka la hiar arsut ha baroh ki liang na ka jingjur palat ka kam bamsap.
Na ka liang u president ka MPCC bad uba dei ruh u MP ka Congress, u Ma Vincent H. Pala haba kren ha kane ka sngi, u la kam ba ka Congress kam duh jingkyrmen wat hadpeng shibun ki jingkynthoh na kiwei ki party bad ka daw kaba ki kynthoh ka dei halor ka nongrim ba ka party Congress haduh mynta ka ieng halor ka nongrim bans hakri ïa ki paidbah.
U la ong ruh ba ka party Congress kam kwah ban ai ka jingkular ba lamler ïa ki paidbah bad ruh ban shu thok ne pynbiej ïa ki paidbah tang ban ioh ïa ka bor bad kum ka party kan kan ieng skhem ha ka nongrim, namar ban shu thok ïa ki paidbah ha kane ka juk ba mynta ki paidbah ki tip kham bha ba kiei kiei baroh ki la don hapoh ka kti lyngba ki Mobile lada ngi leh ïa ka ba bha ki paidbah ki ai ka jingshaniah bad lada ngi leh ïa kaba sneiw ki paidbah hi kin bishar.
Shuh shuh, kum u nongïalam ba rangbah ka Congress ha ka jylla, u Ma Vincent H. Pala u la kyrpad ruh ïa ki nongïalam bad ki kyrtong ba kim dei ban kynthoh ïa kiwei khlem da don ka nongrim, namar ka election commission ka ri India ka la khang pyrshah bad kum ki nongïalam ki hap ban ieng ha ka nongrim bad ban ai ka jingpynshai kaba bniah sha ki paidbah bad ai ba ki paidbah kin bishar ïa ka nongrim jong ka party kaba thmu ban shakri shisha na ka bynta ki paidbah kumba ka Congress ka la synshar la bun phew snem bad ba ka la wan rah shibun ki jingkylla ha ka ri bad wat ha ka jylla Meghalaya, u la bynrap.
Lyngba jong kane ka sngi, ka Ri Bhoi District Congress Committee ka la lah ruh ban plie paidbah noh ïa ka ophis treikam jongka ha Umlyngkdait Nongpoh ba la plie da u Ma Vincent H. Pala bad ha kane ka sngi la aiti ruh ïa ka kyrteng jong ki kyrtong na ki 4 tylli ki Constituency ba kynthup na Nongpoh ban ïa khun da ka Kong Rona Khymdeit, na Umsning ban ïa khun da u Dr. Celestine Lyngdoh, na Jirang ban ïa khun da u Bah Adrian C. Mylliem, na Mawhati ban ïa khun da u Bah Charles Marngar bad na ka Umroi kim pat pyntip ïa ka kyrteng jong u kyrtong.
Kitei ki kyrteng jong ki kyrtong la aiti sha u Ma Vincent H. Pala ba un leit ban aiti pat sha Delhi ba kin bishar bniah shuwa ban pynbna kum kita ki kyrtong ba pura ka Congress na Ri Bhoi.