Ngim shym la leh politik ne kwah burom haba ai burom ïa u Dr. D.D Lapang : Young Mind of Ri Bhoi

Nongpoh, Rymphang 14: Ka Young Mind Association of Ri Bhoi District mynta ka sngi ka la ai khublei kyrpang ïa baroh kito kiba la ïa snoh kti ban ai burom ïa u Dr. D.D Lapang ba kum ka kynhun ka la pynieng syndon da u mot sah jingkynmaw kaba long shi bynta ban ai burom bad ai nam ïa une u nongïalam uba la don hok ban ioh ïa ka burom halor ki synïiang ki bynhei ba u la noh synñing ha Ri Bhoi bad ha ka jylal hi baroh kawei kum u nongïalam ka jylla.
Haba kren sha ki lad pathai khubor mynta ka sngi, u President ka Young Mind Association of Ri Bhoi, u Bah Isynei Hinge, u la ong ba ka seng ryngkat ki nongïalam bad ki dkhot ki la pynpaw shisha ïa ka mynsiem jong ka jingsngewnguh, kaba dei halor ka jingïasnoh kti lang kiba bun ha ka prokram ai burom ïa u Dr. D.D Lapang ba la pynlong hynnin ka sngi ha Ri Bhoi College, ba kum ka seng ruh ka la plie bad pynieng ïa u mot sah jingkynmaw une u nongïalam kaba long ka history ha Ri Bhoi District bad ha ka jylla hi baroh kawei.
U la pynshai bad pynpaw paidbah ruh da kaba ong, “ Ka jingpynieng ïa u mot sahjingkynmaw u Dr. D.D Lapang ha Ri Bhoi College kam dei satia ba ka seng Young Mind ka kwah ban kamai pisa ne kwah leh politik lane kwah burom, hynrei ka seng shuwa ban leh ïa kane ka kam kaba khraw ka la ïa bishar bniah bad ka la ïa syllok na kiba bun ki riew pawkhmat ka Ri Bhoi ha kaba u Dr. D.D Lapang kum u nongïalam uba la la leh shibun ki kam kiba khraw ha ka District bad ka jylla, u la don hok ban ioh ïa kane ka burom ba kum ki paidbah kim dei ban sngewthuh bakla”.
Ha kaba ïa dei bad katei ka jingleh burom, u la ong ruh ba ka seng kam shym la leh politik bad ka hap hi ruh ban khot ïa ki heh sorkar ban ïa ai lang ïa kata ka burom ïa u Dr. D.D Lapang bad kum ka seng hi ka leh ïa kane ka kam da ka lynti kaba beit ba ka don kata ka jingburom ïa kita ki nongïalam kiba la noh synñiang shisha na ka bynta ka imlang ka sahlang ha ka District bad ha ka jylla.
Namarkata, ka seng ka ioh mynsiem ruh da ka jingwan kyrshan jong ki heh sorkar bad kiwei kiwei ki riew rangbah bad ki seng na Ri Bhoi ha katei ka sngi bad kum ka seng hi kam kwah ban ïaid da kano kano ka lynti kaba ïalam bakla ïa u paidbah bad ka thong hi jong ka seng ka long ban ai ka jingshakri bad ban don lang kata ka lyngkor jong ka jingkitkhlieh na ka bynta ban dang ïai trei na ka bynta ban kyntiew ïa ka Ri Bhoi bad ruh ban wan rah ïa ka bha ka miat bad ka roi ka par ha ka District hi baroh kawei, u la bynrap.
Shuh shuh, u la ong ruh ba baroh ki jngpynkreh pynkhrum naduh kaba tei ïa u Mot sah jingkynmaw bad ruh ban pynlong ïa katei ka prokram kaba jop ha katei ka sngi, ka dei hi kaba kum ki dkhot ka seng ki la ïa synñiang lang na ka bynta ban ai burom ïa une u nongïalam bad kum ka seng kam don da kawei pat ka jingmut ban ioh jingïaroh ne burom bad ka dei hi ba ka seng ka kwah ban ai burom ïa une u nongïalam ka Ri Bhoi kaba kum ki paidbah ngi dei ban sngew sarong bad ngi hap ban bud ïa ki dienjat na ka bynta ban dang saindur ïa ka bha ka miat jong ki paidbah ha ka District hi baroh kawei, u la bynrap shuh shuh.