Ngim shahniah ban shu kren tang ha ki Media, ka Sorkar ka dei ban kular da ka jingthoh: Mayborn Lyngdoh

Shillong, ïaïong, 08: Ki nongïalam jong ka Federation of All School Teachers of Meghalaya (FASToM) ha ka sngi Thohdieng ki la kren da kaba shai ba kim shahniah satia ïa ki jingkren jong u Myntri Rangbah ka Jylla u Conrad Kongkal Sangma bad u Myntri ka tnat Pule Puthi u Bah Lahkmen Rymbui tang ha ki lad pathai khubor ba ki la shimkhia ïa ki mat jingdawa hynrei ka seng ka la pynpaw ba ka kwah ba ka Sorkar ka dei ban ai ïa ka jingkular da kaba phah ïa ka jingthoh.
“Ka Sorkar ka shu kren tang ha ki lad pathai khubor ban pynkiew ïa ka jingsiew tulop, katba ngim pat ïoh ïa ka jingthoh na ka Sorkar Jylla ngin ym pat sangeh ïa ki jingïakhih namarba ngim shahniah satia ïa kane ka Sorkar. Kaba ngi shahniah ka long ba ka Sorkar ka dei ban ai jingkular da kaba phah ïa ka jingthoh,” ong u Nongaiktien ka FASToM u Samla Mayborn Lyngdoh haba ïakren bad u Mawphor.
“Watla mynta ka jingïakhih ka jong ngi, ka la poi sha ka taiew kaba lai, hynrei ka Sorkar haduh mynta kam pat don ka jingïakren bad ngi ban shim ïa ka rai ban kyntiew kyrdan Deficit ïa ngi bad ai rai ïa ka jingdawa ban kyntiew ïa ka jingsiew tulop T. 18 hajar bad ban pynkiew ïa ka jingsiew tulop kaba 5 percent manla u snem,” u la ong.
Shuh shuh u la ïathuh ba ki nongïalam ka FASToM kin sa mih na Shillong ha ka janmiet sngi Thohdieng ban ïashim bynta ha ka jingïalang paidbah jong ki nonghikai skul Adhoc ka ban sa long ha Tura, West Garo Hills District ha ka sngi Saitjaiñ khnang ban pan jingkyrshan ha ka jingpynlong ïa ka jingïakhih khnang ban pynkhlaiñ ïa ka jingdawa jong ki hakmat ka Sorkar Jylla.
“Ngin sa pynlong da ka jingïalang lashai ka sngi Saitjaiñ ha Tura ha ka por 11:00 baje mynstep khnang ban pan jingkyrshan na ki para nonghikai ha kaba ïadei bad ki mat jingdawa kiba ka Seng ka ladep pynpaw hakhmat ka Sorkar Jylla ha kaba ïadei bad ka jingdawa ban kyntiew kyrdan Deficit ïa ki skul Adhoc bad ban kyntiew ïa ka jingsiew tulop kaba T. 18 hajar ryngkat bad ka jingpynkiew ïa ka jingsiew tulop kaba 5 percent manla u snem,” ula ong.
“Ha kane ka jingïalang ngin sa pan ka jingkyrshan na ki para nonghikai skul Adhoc kiba don ha Rilum Garo ba kin pynlong ïa ki jingïakhih kiba khlem pud sngi ynda la kut ka eksamin SSLC bad HSSLC tad haduh ba ka Sorkar Jylla kan da shah skhor ïa ki jingdawa jong ki nonghikai skul,” la ong une u nongaiktien ka FASToM
U la ïathuh ba ka Federation kan sa pynlong ïa ka jingïalang paidbah kaba heh nongbah Shillong ïa kaba yn sa pyntip lyngba ki lad pathai khubor bad ha ka rynsan jong ka Social Media ban sa ïashim bynta da ki nonghikai skul Adhoc, ki kurim, ki khun ki kit, ki bahaing hasem, ki khynnah skul barim bad ki paidbah ki ban ai jingkyrshan ïa kane ka jingdawa.