Ngim pyrshah ïa ki kompeni ba wan ai kam hynrei ki dei ban ïaid katkum ki aiñ: Dundee Khongsit

Shillong, Naitung 17: U Nongïalam ka seng FKJGP u Bah Dundee Khongsit u la ong ba ki sengbhalang kim pyrshah ïa kino kino ki kompeni kiba kwah ban wan sengkam bad ban aikam aijam ïa ki khun samla ka jaitbynriew hynrei kidei pat ban wan da ka lynti kaba dei lyngba ka jingpyntreikam ïa ka ILP bad da ka lynti jong ka aiñ bad ban pyntreikam ïa ki policy ba ka sorkar ka don ha kaba ïadei bad ka Industrial Policy.
Kaei kaba sngewsih ka long ba ka jingwan ki kompeni kim ju bat satia ïa ki kyndon aiñ ai kam ai jam bad ka sorkar ruh kam don ïa ki aiñ kiba donkam kumba la ïohi ha kine ki sngi, u la ong. “Ngi ïohi kiba ñiah kali tourist na jylla ki la ïakhih bad dawa na ka sorkar ba ka dei ban khang noh ïa ki kali Assam kiba leit buh ïa ki nongwan jngohkai sha ki jaka bapher bapher jong ka jylla namar kane ka la ktah ïa ka jakpoh ka jong ki,” u la ong.
U la ong ba watla ka jylla ka dei ka pdeng jong ka pule puthi ka long ba ka donkam ban phikir na ka jingwan ki briew kiba nabar khlem da ïaid katkum ki kyndon aiñ.
Ha kaba ïadei bad ka jingrakhe ïa ka lyngkhuh sngi khlad ba 189 jong u Syiem Tirot Sing Syiem u la ai khublei ïa ka KSU kaba la pynïeng ïa une u mot hapoh State Central Library bad ka snam ka jong u ka dang ud haduh mynta mynne na ka bynta kadaw bah jong ka jaitbynriew, namar ka jaitbynriew kaba khih ba ksar kadei ka jaitbynriew kaba im bad ki sengbhalang ki ïai dawa na ka por sha ka por ïa ka sorkar ba kan shna ïa ki aiñ ban ïada ïa ka jaitbynriew.
Katba na ka liang jong u Bah Sadon Blah u nongïalam ka HNYF sengkmie u la ong ba ka seng naduh mynshwa kam ju shaniah ha ka jingsynshar bun rong ne bun lama hapoh ka jylla bad ka seng ka la dei kawei na ki seng ka bym treh ha ka jingsynshar bun rong ne ban ïashim bynta ruh ha ka elekshon. “U Tirot sing bad kiwei ki khla wait ka ri kim dei ki politician ne ki nongïalam jong ki seng saiñ pyrthei hynrei ki la ïalam ïa ka jaitbynriew ba kan neh kan sah haduh mynta mynne,” u la ong.