Ngim pat long nong India ba pura haduh mynta: Bah Edward

Nongstoiñ, Naitung, 23: Ka seng Hynñiewtrep National Youth Front ha ka sngi saitjaiñ, ka la ïoh ban pynthymmai noh ïa ki nongkitkam jong ka Nongstoiñ pyllun, ha kaba u bah Edward Thangkhiew Assistant General Secretary ka HNYF sengkmie, u la ïoh ban wan ban pyntian smai ïa ki dkhot jong ka, ha ka jingïalang ïa kaba la pynlong ha ophis treikam jong seng kaba don ha sor Nongstoiñ.
Ki dkhot kiba thymmai jong ka HNYF Nongstoiñ Pyllun na ka bynta ka samoi treikam 2023 haduh 2026, ki kynthup ïa u bah Phaskal Nongrum kum u president, Tibarwell Marweiñ General Secretary, Charlie Mawlieh kum u finance bad kiwei kiwei.
Ha katei ka jingïalang la ïadonlang ruh u bah B.Marbaniang President rangbah ka HNYF WKHD, bah T.Swer bad la pynïaid ïa katei ka jingïalang da u bah Smalling Nongsiang Vice President HNYF WKHD.
U bah Edward Thangkhiew haba ai jingkren kum u kongsan, u la ïathuh ba ïa ka seng HNYF la seng da ka seng HNLC naduh u snem 1996, ban trei na ka bynta ka jaidbynriew ha kaba paw pyrthei bad ba ki Khasi haduh mynta kim pat dei ki nong India kiba pura hynrei la shu leh donbor ïa ka jaidbynriew.
“Ka tynrai ban ïaleh pyrshah ïa ki mynder ka mih na u Wickliffe Syiem u ba dei u Syiem khynnah ka Hima Nongstoiñ, la bud ïa ki dienjat da ka seng HNLC bud pat sa ka HNYF”, ong utei u rangbah ha katei ka sngi pyntian smai ïa ki dkhot ka HNYF Nongstoiñ Pyllun.