Ngim pat ïoh jingkhot sngewbha na u CM ban don bynta lang noh bad ka MDA, ong u MLA Congress

Shillong, Jylliew 20: U MLA bad MDC jong ka Congress na Nongstoiñ u Bah Gabriel Wahlang ha ka sngi Ba-ar u la ïathuh ba ka seng Congress kan ai jingkyrshan ïa ka seng National People’s Party (NPP) tang ha Khasi Hills Autonomous District Council (KHADC) ym ïa ka Sorkar MDA-II kaba ïalam da ka NPP hi.
Ha ka jingïakren bad ki nongthoh khubor u Bah Gabriel Wahlang ula ong, ba ka Congress kat haduh mynta kam pat shym la ïoh satia ïa kano kano ka jingtyrwa na u Myntri Rangbah ka jylla uba dei ruh u President ka NPP u Conrad K Sangma ban don lang noh ha ka sorkar.
“Kat haduh mynta ngim pat ïoh kano kano ka jingtyrwa ba ngin don ha ka MDA”,u la ong.
U la ïathuh ruh ba ka jingai jingkyrshan ka Congress ïa ka NPP ka dei beit tang ha District Council ym ha ka sorkar jylla namar u ong ba ka daw hi ka jingai jingkyrshan ka dei beit na bynta ka bha ka miat ka jaidbynriew.
“Ka District Council ka ïapher na ka sorkar jylla, ha ka District Council ngi peit ïa ka bynta jong ka kolshor ki paidbah kumta kam don satia kano kano ka lad ba ngin leit ai jingkyrshan ïa ka sorkar MDA”, ula ong.