Ngim lah ban khang ïa ki lynti ïaid ki hati, hynrei hap ban pynduna ïa ka jingtynkhuh bad ki briew : Conrad

Shillong, Rymphang 23: U Myntri Rangbah ka jylla u Conrad K Sangma u la ong ba kam shymla don kano kano ka sienjam ban pynsangeh ïa ki hati ban ïaid na ka lynti kaba kidei ban ïaid bad ka sorkar kan hap ban shim ïa ki lynti ban pynduna na ka jingïatyngkhuh bad ki briew.
Na ka liang jong u Myntri Rangbah u la pyntip ruh ba ka la don ka jingai jinghikai ha kaba ïadei bad kane ka bynta bad ka la don ruh ka Village Protection Scheme ba la buh da ka sorkar.
Shuh shuh u Myntri Rangbah u la pyntip ruh ba ki don haduh 4 tylli ki wildlife sanctuary ha ka jylla kiba kynthup ia ka Nongkhyllem, Siju, Baghmara Pitcher Plant bad Narpuh bad ki ar tylli ki national park ka Balpakram National Park bad Nokrek National Park.
U la pyntip ruh ba na ka liang jong ka sorkar ka dang pynkhreh ban ithuh ruh ïa ki artylli ki wildlife sanctuary ba kynthup ïa ka Baghmara bad Riat Khwan.