Shillong, Risaw 28 : Ka Sur ka Bri u Hynñiewtrep ha ka sngi Thohdïeng ka la ong ba kim kwah satia ba kin buh mawnongrim na ka bynta ki khun ki kti bad ka pateng ban sa wan da ka ktem khalai bad dei na kata ka daw ki ïeng pyrshah beit ïa ka jingthmu jong ka sorkar ban buh ïa ka Casino ha Ri Bhoi District.
“Kumno kan long ba mangi ki kmie ki kpa ngi buh mawnongrim ïa ki khun ki kti ki jongngi da u mawnongrim uba lah ban ïalam ïangi sha ki jingpynjot. Ban ong pynmih khajna da ka ktem khalai ka long ka bym lah ban pdiang nalorba ka kyiad ka la dep ban pynjot lypa bad pynpait pynpra ïa ki longïing longsem,” ong ka Organising Secretary jongka KSBUH, Kong Purity Phawa haba kren bad ki lad pathai khubor ha Shillong Press Club.
Nalorkata, ka ong ruh ba kum ka Longkmie bad kum ka kynhun hi ka dap da ka jingsngewkhia da kaba ong ba ka Casino kadei sa kawei pat ka kam khalai nalor kiwei ki kam khalai kiba la don lypa ha ka jylla. “Hynrei kane ka lad khalai ba wanrah da ka sorkar jylla da kaba thaw da ki aiñ kiba long khyllah ha ka jaka ki aiñ kiban tei ïa ka Ri bad ka Jaidbynriewki long ki bym lah satia ban pdiang,” la bynrap shuh shuh ka kong Phawa.
Katei ka longkmie ka ong ruh ban ong ba ka Casino kadei kawei na ki lad aikam aijam na ka bynta ka Jaidbynriew kadei ka kam kaba bakla jur bad ba kum ka kynhun kim lah satia ban pdiang.
Kumban shu kdew hangne, ka sorkar jylla dang shen ka la pynbna ba kan pyndam noh ïa ka aiñ khalai ba la tip kum ka Meghalaya Regulation of Gaming Act (MRGA), 2021. Na ka liang u Myntri Rangbah ka Jylla, Conrad K Sangma u la pyntip ruh ba ïa ka Ordinance na ka bynta ban weng noh ïa katei ka aiñ ynsa rah shen ha ka jingïalang jong ka kynhun Myntri.
