Ngim kwah ba ka jingplie ïa ka surok kan pynslem ïa ka jingpynkynriah ïa ki briew: KHNAM

Shillong, Risaw, 31: Ka Khun Hynñiewtrep National Awakening Movement (KHNAM) ha ka sngi Palei ka la kynthoh ba ka jingshim rai jong ka Sorkar ban plie noh ïa ka surok na Mawlonghat sha lad Bimola kaba la khang la hynriew snem kan nang pynslem ban pynkynriah ïa ki briew kiba sah ha Them Ïewmawlong.
Ha u kyrwoh ba la phah sha ki lad pathai khubor, u Working President jong ka KHNAM u Bah Thomas Passah u la ong, “Kum ka seng hi haba katkum ki jingpynsngew jong ka Sorkar ba kin weng noh ïa kine ki briew na them Ïewmawlong te balei ba kam wengnoh bad sa plie ïa ka surok.”
“La 6 snem ka la shim por ban pynurlong ïa ka jingdawa jong ki paidbah bad ki ladei ki por kiba slem bha bad la ïohi ruh ïa ka jingpyndem tdong jong ka Sorkar ha ka Harijan Panchayat Committee (HPC) la bunsien ha kine ki hynriew snem, kaba ai mynsiem ban lehmon bad sngewmeng pat ïa kine ki briew,” la kynthoh ka KHNAM.
“Katta ngi la ïai shah ha kaba ïadei bad katei ka surok kumta ngin ïaishah sa katto katno sngi bad ka Sorkar ka dei ban weng noh mardor ïa kine ki briew bad sa leh pat ïa kiwei ki kam kiba donkam. Ngim kwah ba ka jingplie ïa ka surok kan pynslem pat ïa ka jingpynkynriah ïa ki briew,” la bynrap ka KHNAM.