Shillong, Naiwieng 17 : U Working President jong ka National People’s Party (NPP) ba dei peit ïa ka rilum Garo u Marcuise N Marak u la ong ba kim kwah satia ban kob tangba ka jingkyrmen pat ka don ba ka party kan leh bha ha kane ka elekshon MDC kaban sa long shen ha u snem ban wan ha Garo Hills Autonomous District Council (GHADC).
Haba kren bad ki lad pathai khubor, u Marcuise uba bat ruh ïa ka shuki Myntri Sorkar ka Jylla u la ong ba ki don bun bha ki daw kiba kum ka party ka don ka jingkyrmen ban leh bha ha kaneka elekshon khamtam eh na ka jingïarap ïa ka Council haba ïadei bad ka jingsiew ïa ka tulop.
“Ngim kob tangba ngi don pat ka jingkyrmen ba ka party kan leh bha ha kane ka elekshon,” u la ong.
Katkum ka jingïathuh jong u, mynta ka party ka dang khot ïa ki kyrtong kiba kwah ban ïakhun na ka party bad la buh por ïa kito kiba kwah ban ïakhun ba kin thep kyrteng noh ha shwa ka 30tarik mynta u bnai. Nangta u la ïathuh ruh ba ka jingjied ïa ki kyrtong kin pyndep noh ha ka taiew ba ar jong u Nohprah.
Shuh shuh u Marcuise u la ong ruh ba ka jingkyrshan jong ka sorkar ïa ka GHADC ka la pynlong ruh ïa ki nongtrei ka Council ban pynpaw ka jingsngewnguh ïa u Myntri Rangbah ka Jylla.
“Dang shen ha ka por ba u Myntri Rangbah u don ha rilum Garo na ka liang ka kynhun ki nongtrei jong ka Council ki la leit ban kynduh bad pynpaw ïa ka jingsngewnguh ïa u namar ka jingpyllait ïa ka tulop kaba shisnem bad kumjuh na ka bynta ka jingpyllait ïa ka tulop jong u bnai Naiwieng,” u la ïathuh.
Haba jubab pat halor ka jingkylli, une u heh ka NPP u la ïathuh ruh ba haduh mynta kim pat lah satia ban rai kumno ban leh la ka long ban treilang bad kino kino ki party hashwa lane hadien ka elekshon. “Kane ka shong ha ka party ban shim ïa ka rai lang,” u la bynrap shuh shuh.
Ha kajuh ka por u la ong ruh ba ka jingïakhun mynta ka kynti kan ym da eh than khamtam hadien ba ki ïohi ïa ka elekshon MLA ha Bihar ha kaba ka Congress kam shym la lah satia ban leh bha.
