Ngim ju sdang, hynrei lada ki sdang ngi ruh ngin nym ai-li : Khasi Student Union

Mawkyrwat, ‘Nailur, 27: Ka Khasi Students’ Union (KSU) jong ka South West Khasi Hills District namar ka jingshah pyndik ki nonghikai khasi kiba hikai sha ki thaiñ khappud jong ka South West Khasi Hills District da ka jingsngewkhia kim banse ban pyntip sha ki bor ba dei peit jong ka distrik sha ka Deputy Commissioner, South West Khasi Hills District halor ki jingeh bad ka shongsuk shongshngaiñ ki nonghikai khasi sha ki thaiñ khappud.
Shuh shuh katkum ka dorkhas ba ki la phah sha ka Deputy Commissioner, South West Khasi Hills District ki la pynpaw ba ha kine ki khyndiat sngi ki la don ruh ki Nonghikai kiba la hap ban wan phai ïing noh na ka daw ka jingtieng hadien ba la mih ka kynja jingpynbna (Notice) na ka GSU bad AKHAF kiba kum ka seng hi ka la shim ba ka dei ka jingpyrshang ban pyntieng, pynsmiej bad ïuhroit ïa ka hok jong ki nonghikai khasi hapoh katei ka thaiñ. Kum ka seng, ka la ïoh ïa kynduh ruh ïa ki katto katne na ki nonghikai bad ka sngewthuh ba kiba bun na ki ki pynpaw ba kim da don ha ka jingsngew shngaiñ haba kin leit ban pyndep ïa la ka kamram jong ki sha ki skul kiba don sha ka thaiñ khappud bad ka Bangladesh na ka daw ki jingjia kiba kum kine.
Namarkata, kum ka Seng ka bym kwah ban mih ki jingïapher jaitbynriew hapdeng ki Khasi bad ki Garo kiba sah ha South West Khasi Hills District, ka la shim ïa kane ka synjam ban ujor bad pynsngew ha ki bor ba dei peit ban kin wad bad peit bha halor kane ka bynta khnang ban tehlakam ïa ki jingjia ba sngewsih hadien habud namar yn nym don hi kiba lah ban shu peit lada ki para ri bad paradoh para snam ki shah pynthud bad pyndik na ka por sha ka por.
Ka Seng kyntu ba ka District Administration kan ban pynthikna ba ki nonghikai khasi kiba hikai ha kitei ki thaiñ kin don ha ka jingshong shngaiñ bad ka dawa ruh ba dei ban pynshitom ruh ïa kiba kum kita ki briew kiba ju wanrah ïa ka jingïapher Jaitbyn-riew da kaba pynbna bad pynshit pher Jaitbynriew ban buh ïa ki nonghikai khasi hapdeng ka jingsngewsyier ka ban ktah ruh ïa ka shongsuk shongshngaiñ hadien habud.
U President ka KSU South West Khasi Hills District, bah Forwardman Nongrem haba kren ha ki lad pathai khubor hadien ka jingleit ïa kynduh ïa ka Deputy Commissioner, South West Khasi Hills District u la ong ba ka jingmih jong kane ka jingpynïapher jaidbynriew da lei lei kum ka seng kan nym pdiang namar ki im hi hapoh u pud u sam jong ka South West Khasi Hills District.
Namarkata, u la ai mynsiem ïa ki nonghikai ba kane ka dei ka jaka jong ka Ri Khasi, kim dei ban tieng ban smiej namar hynrei ki dei ban pyndep beit ïa ka jong ka bynta ba la bynshet bad bun ruh ka jingkyrpad ba lada don kano kano ka jingpynthut kin ai jingtip sha ka seng khnang ba ka seng ruh kan nym ai lad ïa kiba kita ki briew la ki dei ki Garo ne kiwei de ki jaidbynriew. Shuh shuh u la maham ruh ïa kita kiba shim kabu da kaba thmu ban phiah jaitbynriew bad kiba thmu ban pyndik ba ki dei ban pyrkhat arsien namar, “Ngim ju sdang, hynrei lada ki ki sdang kum ka seng ruh kan nym ai-li da lei lei”, ong u President ka KSU South West Khasi Hills District, bah Forwardman Nongrem.