Ngim ju ïoh bainong 5 hajar, wat ka 2 hajar ruh bun ba ngi duh, ong ki ASHA

Shillong, Naiwieng 07: Ki nongtrei ASHA kiba don hapoh ka shatri jong ka Meghalaya ASHA Workers Union (MAWU) ha ka sngi Baar ki la pynpaw ïa ka jingbym hun halor ka jubab jong ka Myntri ka tnat ka Koit ka Khiah ka Dr. Ampareen Lyngdoh ha kaba ïadei bad ka jingdawa ban kyntiew ïa ka bai nong jong ki ASHA kiba shakri ha kylleng ki shnong jong ka Jylla Meghalaya.
Ka President ka MAWU ka Kong Mira June Myrsing ha ka jingïakren bad ki lad pathai khubor ka la ong, “ha ka jingïakynduh ha ka 30 tarik u Risaw, ïa ka Myntri ka Koit ka Khiah ngi ïoh ka jingkular ba yn ïakren ïa ka jingdawa kyntiew bainong hynrei ngim poi pyrkhat ba kan long pynban da kumne.”
Haba kynthoh ïa ka jingkren jong ka Dr. Ampareen halor kajingïalang ba la long bad u Myntri Rangbah ka Jylla u Conrad K Sangma ha ka Lah Sngi u Blei, ka Kong Mira June ka la ong, “ki nongtrei ASHA kim ju ïoh haduh T.5000 hajar kumba la kren da ka Myntri hynrei ki ïoh tang T. 2000 hajar kata ruh kim ju ïoh lut hynrei ki ïoh tang T.800 na ka National Health Mission (NHM).”
“Ngi shaniah ïa ka Sorkar Jylla bad dei namar kane ngim shym la mih sha madan ban ïakhih hynrei ngim lah ban pdiang pat ïa ka jingong jong ka Mynti ba ki ASHA ki ïoh T.5000,” ka la ong.
Halor ka jingong jong ka Myntri ba ki ASHA ki dei ki nongtrei mon sngewbha, ka Kong Mira June ka la ong, “lada ki ASHA ki dei ki nongtrei mon sngewbha, ka Myntri kam don hok ban khot ïa ki ASHA ban wan trei noh. Lada ngi dei ki nongtrei mon sngewbha ngi don ka hok ban wan trei ne pep trei.
“Ngim lah ban pdiang ïa ka jingkam jong ka Myntri ba ki ASHA ki dei tang ki nongtrei mon sngewbha. Ngi la shim syndon ïa ka rai ban pynbna ïa ka jingïakhih da kaba sangeh treikam ha baroh kawei ka Jylla,” la ong ka nongïalam jong ka MAWU.
Ka nongaibuit jong ka MAWU ka Kong Sonny Kharjana ka la ong “ka Union ka dawa ïa ka sorkar Jylla ban kyntiew ïa ka bai nong na ka T.2000 hajar sha ka T.5000 manla u bnai namar hadien ba ki kynthei ki shimti ïa ka kam ASHA kim lah shuh ban leit bylla shawei pat.”
Ka la ïathuh ruh naduh u snem 2005 ïa ki ASHA la pyndonkam da ki nongtrei jong ka ka tnat ka Koit ka Khiah ban ïarap haba leit ai injek shon ne ai dawai ïa ki nongshong shnong ha ki shnong ka jylla.
Ka la ong ruh ba lada ka Sorkar ka khot ïakren ki nongïalam ka Union ki long kiba kloi ban leit sha ka miej jingïakren.