Mawlasnai, Jylliew 06: U MLA jong ka Mawlai, u Bah Brightstarwell Marbañiang, u la ong ba ka Seng VPP kan nym pynphai kylla ïa ki jingkynnoh bad ki jingbeiñ ha kine ki sngi, kynthup ïa ka jingkynnoh u Bah Paul Lyngdoh, Myntri ka Sorkar jylla.
Haba kren ha ka jingïalang jong ka Seng VPP ha Mawlasnai mynta ka sngi, u Bah Brigt, u la ong ba ka Seng kam don por ban pynphai kylla ïa ki jingkynnoh jong ki Nongïalam, hynrei kan ieh ha ki paidbah ban bishar, namar ki paidbah mynta ki la shai bad ki la sngewthuh ban bishar mano ba trei bad ïeng ha ka hok bad ka jingshisha mano ba shu heh tang ka tyngam.
“Ngi ha ka VPP ngin kit da ka khoh kaba pei. Lada phi kawang maw un hap noh, lada phi kawang ktien ruh kam snoh kan hap noh bad lada phi kawang da kaei kaei ruh kan nym neh”, la ong u Bah Bright.
U la ong ba ka VPP ha ka jingïalam jong u Bah Ardent Basaïawmoit kan ïaid da ka mynsiem kaba sngew rit ban shakri hok ïa ka ri bad ka jaidbynriew bad kam kwah ban pyllut por ha ka jingïakawang ktieh, namar ba ki ishu jong ka jaidbynriew ki kham khraw shibun ïa ka jingbeiñ jingkhoh u briew shimet.
Ha kaba ïadei bad ka jingdawa ban pynbha ïa ka Reservation Policy, u nongïalam ka VPP, u la ong ba ka Party ka pynpaw ka jingsngewnguh ïa ki paidbah kiba la ai ka jingkyrshan ïa ka jingdawa ka VPP bad ïa ka jingshah thngan jong u Bah Ardent ha kaba ka Sorkar ka la rai ban thung da ka Expert Committee na ka bynta ban pynbha ïa ka Reservation Policy. “Na ka liang jong ka Seng ka ai khublei ïa ki paidbah kiba la ai ka jingkyrshan kiba la kyrshan ïa ka jingshah thngan i Bah Ardent ha Shillong”, la ong u MLA ka Mawlai.
U Bah Adelbert Nongrum, MLA ka North Shillong, haba kren ha kane ka jingïalang, u la ong ba ka daw ka jingjot jong ka ri bad ka jaidbynriew kadei namar ka jingkwah burom jong ki katto katne ki nongïalam, kiba ïalade kim nud ban leh bad ynda leh kiwei pat ki kynthoh ki beiñ ki khoh. U la ong ba ka VPP hapoh ka jingïalam u Bah Ardent kan ïai bteng ban trei bad rah ïa ki mat jong ki Samla bad jong ka ri bad ka jaidbynriew, la ka long ha Assembly ne ha surok kam pher, ka Seng ban mih ban ïakhun beit.
U la maham ruh ïa ka sorkar ba kam dei ban pynslem ka jingtreikam ha kaba ïadei bad ka Expert Committee ban pynbha ïa ka Reservation Policy namar kane kadei ka mat kaba ki paidbah jong ka ri ki la angnud la slem.
Ha kane ka jingïalang la ïoh ruh ka jingkren na u MLA jong ka Mawryngkneng, u Bah HS Kharpran, nangta na u General Secretary ka Seng, u Dr. Ricky AJ Syngkon bad kiwei kiwei.
Hadien ka jingïalang da ki spah ngut ki paidbah ki la shim ïa ki form bad pynrung dkhot sha ka Voice of the People Party (VPP)
