Ngim donkam ïa ki kam pynroi ban pynïap ïa ki para doh para snam jong ngi: Osternic Marbaniang

Nongstoiñ, Nailar, 23: Ka Khasi Student’s Union Mawshynrut Circle ka la ïoh ban ban pynthymmai ïa ki nongkitkam jong ka KSU Mawtynrong unit ha ka sngi saitjaiñ. Ha katei ka sngi la pynïaid ïa ka jingïalang da u Samla Anselm Ryntong u ba dei u Assistant Organising Secretary jong ka KSU West Khasi Hills District Unit bad u Organising Secretary ka KSU Mawshynrut Circle
Ha kane ka jingïalang la ïoh jingkren pdiang sngewbha na u vice chairman jong ka shnong Tynrongriangkhon u Bah P.Thongni, u ba haba ai jingkren u la ai mynsiem ïa ki dkhot jong ka Mawtynrong unit ban ïa trei ryngkat bad ka circle ne District, haba don kano kano ka jingeh ha ka dong ka thaiñ bad khamtam haba ka jaitbynriew ka donkam, ki dei ban long kiba la kloi ban ïasnoh kti na bynta ka daw bah ka jaitbynriew.
U Samla Samla John Fisher Nongsiang President ka KSU West khasi Hills District unit, haba ai jingkren u la ong ba ka seng KSU kam dei kaba peit tang kawei ka issue, hynrei ka peit ïa baroh ki jingeh jong ka jaidbynriew. “Ngi dei ban ïohi jngai ïa ka jingeh jong ka Ri bad ka jaidbynriew hi baroh kawei. Ngi dei ban long ki Samla ki ban ïohi jngai, ngim dei ban shah ïalam bakla, ngi dei ban ïatylli bad ngi dei ban ïa sngewthuh jingmut”, u la ong.
“Ka seng kam da donkam tang ïa ki khynnah ki ba pass degrees ne masters, hynrei ka seng ka donkam ïa kiba ieid ïa ka Ri bad ka jaidbynriew. Lada ngi long doktor ne Engineer ruh kam myntoi lada ngim kynmaw ïa ka Ri bad jaidbynriew lajong. Ngim donkam ka spah ne kyrdan ngi donkam ïa ki samla ki ba ieid ïa ka Ri bad ka jaidbynriew”.
“Ha ka seng ngi donkam ïa ki samla ki ba ieid ïa ka Ri bad ka jaidbynriew bad ban tynrong ïa ka khia ka shon, haba ka jaidbynriew ka donkam ban lait na ka jingshah ban beiñ ha kiwei pat ki jaidbynriew”, u la ong.
Ïa ka bynta ba kongsan ban pyntian smai ïa ki nongkitkam bad ki dkhot jong ka KSU Mawtynrong unit, la shim da u samla Osternic Marbaniang Organising Secretary ka KSU Sengkmie. Haba ai jingkren u la kren ban pynkynmaw ïa ka jingthmu jong ka sorkar India ban tih Uranium ha Mawthabah ha South West bad ha West khasi Hills District, ka seng ka ieng ha ka nongrim ba skhem ban pyrshah ban tih ïa u marpoh khyndew u ba long ka bih uba khraw ïa ki jait jingthaw baroh”.
Shuh shuh u la pynkynmaw ruh ba haba ka seng ka leit sha Mawthabah, ka lap ba la don shisha ki khunlung ki duna ha ki dkhot met, namar ka jingshah ktah ha une u mar poh khyndew u ba long shisha ka bih namar tang da kaba drill u la ktah katne katne.
Kaba sngew lyngngoh ka long ba haba ka seng ka wan sha katei ka jaka, ki ba haïing jong kiba shah ktah ha u uranium naduh khunlung, hynrei ki khlem ïoh ïa ki lad jingïarap ne ïada na ka sorkar wat ïa ki disability certificate. Kumta na ka liang jong ki nongïalam ka seng marsien ïoh sngew ïa kane, mar mar ki la buddien bad na ka liang ki nongtrei sorkar ki pynksan kylla da kaba ong ki ba haïing ki khlem wan mih sha ka tnad treikam.
U la ong ruh, “Ka jingïoh ïa ka roi ka par ngi donkam, hynrei ngi donkam ïa ka roi ka par kaba kumno kaba ngi donkam kum ka jaidbynriew ka jong ngi. Ngi hap ban peit ïa ki development ki ban ïaid ryngkat ryngkat bad jingshong suk shong shngaiñ jong ki para doh para snam jong ngi. Ngim donkam ïa kata ka development ka ban pynjot bad ban pynïap stai ïa u paradoh para snam jong ngi”, u la ong.
Ha katei ka sngi la ïa don ryngkat ruh u Samla Armstong Sohshang bad Ulysis Ryntong President bad General Secretary KSU Mawshynrut Circle ryngkat katto katne ki dlhot bad katto katne ki Nongïalam na Sengkmie bad na ka West Khasi Hills District Unit. Ki nongïalam bad ki Dkhot ka KSU Mawtynrong Unit ki long Khlaiñbor L Nonglait President, Drewlantis Ïawphñïaw Vice President, Messwell Lyngkhoi General Secretary, Spaiñdingwell Lyngkhoi Assistant General Secretary, Esraborwell Kharrit Finance bad kiwei kiwei.