Ngim dei eh ban tieng, ka Land Transfer Act bad Sixth Scheudle ka la khanglad ïa ki mynder ban buhai shnong: Kyrmen

Shillong, Naitung 28 : U Myntri ka sorkar jylla, Bah Kyrmen Shylla ha ka sngi Nyngkong u la ong ba ka jingdon jong ka Meghalaya ïa ka Land Transfer Act bad kumjuh ka Sixth Schedule ka la ïarap haduh katta katta ban ïada na ka jingwan buhai shnong ki mynder ha u pud u sam jong ka jylla khamtam ha kum kane ka por ba ka jylla ba marjan ka khynra naphang ïa ki mynder.
U Myntri u ong ruh ba tang kine ar tylli ki la ïada bad ki la buh ïa ki trai muluk trai jaka ha ka jingshngain namar la khanglad lypa ïa ki briew kiba nabar ba kin ïoh thied jaka puta ha ka jylla khlem da ïoh shwa ïa ki kot ki sla kiba biang.
“Haba phai sha ka jingwan ki mynder, ngi long kiba la pyrkhu namar la ïada ïangi da ka Land Transfer Act bad ka Sixth Schedue ha kaba ki briew kiba nabar kim lah ban wan ban sah katba mon bad khamtam eh ba kin lah ban thied jaka puta khlem da biang ki kot ki sla. Ka dei ka kam ruh ka bym lah ban long ba kiba nabar ba kin ïoh jaka puta namar la dep ban ïada pura ïangi,” bynrap biang u Bah Kyrmen Shylla.
Hynrei u ong pat ba watla katta, ki dang donkam pat ka jingïada kiba kham paka lada dang ïoh kum ka Inner Line Permit lane kum ka Meghalaya Residents Safety and Security Act (MRSSA) lane kino kino ki kyndon kiba pynkhlain ïa ka jingïada ïa ki trai ri trai muluk. “Ïa mynta hi ngim donkam satia ban tieng namar tang kiba la don lypa ki la biang pura ban ïada ïangi khamtam eh ka Land Transfer Act,” u la ong da kaba banjur ban long pat kiba peitngor ïa ka jingïoh rung ki briew kiba nabar sha ka jylla.
Ha kawei pat ka liang, u Myntri u la ong ba ha kiba bun ki khep la ju iathuh ïa u ba ka jingeh ban teh lakam ïa ka jingïoh rung ki briew kiba nabar kadei lyngba ka shongkha shongman. U ong ruh ba kane ka mut hapdeng ki kynthei trai shnong bad ki shynrang nongwei kiba shim kabu ban ïoh rung sha ka jylla lyngba kane ka buit. Tangba u ong pat ba kane lah ban khanglad tang lada ka shnong ka thaw ka ïatreilang.
Haba kren pat halor ka jingkhynra mynder jong ka Assam, u Myntri u ong ba ka jingdonkam ban peitngor bad pynkhlain ïa ki bor pahara kam dei satia tang ha East Jaintia hynrei ha baroh kawei ka jylla.
Tangba u ong ba u ai ka jingshaniah kaba pura ha ki ophisar bad ki bor pahara ka jylla ryngkat ki bor distrik kiba don ïa ka jingtbit kumno ban tehlakam bad buh ïa ka jylla ha ka jingshngain.