Ngim dei ban ñiew shiliang khmat la ki dei ki shynrang ne ki kynthei: Bah E. Tariang

Mawkyrwat, Risaw 13: Kum shibynta jong ka jingïasnohkitlang ha ka jingrakhe ïa ka sngi kyrpang jong ki khynnah kynthei kaba la tip kum ka ‘International Girl Child Day 2024’, ka District Hub for Empowerment of Women (DHEW) ka tnad treikam jong ka Social Welfare, South West Khasi Hills District ka la ïoh ban rakhe ïa kane ka sngi kyrpang kaba ka phang ka long, “Girls Vision for the Future” ne “Ka jingthmu jong ki khynnah kynthei na ka bynta ka lawei”, ba la pynlong hapoh ka Nativity Hall, Mawkyrwat.
La rakhe ïa kane ka ‘International Girl Child Day 2024’ manla u snem ha ka 11 tarik u Risaw, kaba dei ka sngi kyrpang bad ba kongsan ha ka pyrthei ha kaba ban rakhe kynmaw burom ïa ki khynnah kynthei ha manla ki jaka, da kaba pynkhraw ïa ki sur, ki kam bad ka jinglong nongïalam jong ki. Ka dei ruh ka sngi kaba baroh ki don ka jingsngewkhia ïa ki khynnah kynthei bad ïa ka hok jong ki. Namar ha kane ka sngi, ki ïawan lang ban ithuh bad ïasaid na ka bynta ka hok jong ki khynnah kynthei kaba pura.
Kiba la wan ban ïa shimbynta ha kane ka jingrakhe ïa ka sngi kyrpang ki long haduh ki 10 tylli ki skul ha ryngkat ki nonghikai bad kumjuh ki nongtrei hapoh jong ka District Hub for Empowerment of Women (DHEW), South West Khasi Hills District ha kaba u bah E. Tariang, District Social Welfare Officer (DSWO), South West Khasi Hills District u la long kum u kongsan.
Haba kren kum u kongsan, u Bah E. Tariang u la ong ba ka jingrakhe ïa ka sngi ka ‘International Girl Child Day 2024’ ka long namar ba 25 snem mynshwa ka United Nation Organisation (UNO) ha u snem 1995 ha Beijing ki la pynlong ka jingïalang ïathir jingmut kumno ban don ka jingïakren ïa ki jingeh jong ki kynthei naduh ki longkmie bad ki khynnah kiba ki ki ïa kynduh ha ka jingim bad ki la ïa kren ïa ki hok jong ki kaba long naduh ka pule puthi, ka jingkoit jingkhiah, ka jingïada ha ka longrynïeng jong ki ruh. “Ha ka 19 tarik u Nohphrah, 2011, ka Dorbar Bah jong ka pyrthei ka UNO ka la jied ban mynjur ïa ka rai bad la pdiang ïa ka 11 tarik u Risaw manla u snem kum ka sngi ban rakhe ïa ka sngi kyrpang ki khynnah kynthei ha ka pyrthei baroh kawei”, ong u bah Tariang.
Shuh shuh ha ka jingkren jong u la pynkynmaw ruh ba ha kiwei ki jylla kim ju kham kheiñ kor ïa ki khun kynthei kumba long ha ka jylla Meghalaya namar lada ki ïoh khun kynthei ki hap ban siew ïa ka dowry ynda la dei por ban kyntiew kurim. Namarkata, u la kyntu ba ngim dei ym ñiew shilliang khmat la ki dei ki kynthei ne shynrang hynrei ngin ñiewkor kyllum lang khnang ba ma ki ruh kin ïoh ka hok kaba mar katjuh.
Kiwei de kiba la ai jingkren ki long u Bah P. Wahlang, District Child Protection Officer, South West Khasi Hills District bad ka kong Ilawanshwa Nongsiej ka nongrwai ba paw hapoh South West Khasi Hills District kaba la ai ruh ka jingrwai kaba sngewtynnad.
Hadien ka program ka la don ruh ka jingsam ïa ki khusnam nongjop ha ka jingïakop dro jingdro kaba ka Eureka Kharsyiemiong ka la wan ba nyngkong, ka Ewansuk Marweiñ ha ka kyrdan ba ar bad ka Balathehsei Shylla ha ka kyrdan ba lai.
Ha ka Slogan la jop da ka Ladianghun Wanniang, ba ar u Wellbokshisha Thongni bad ba lai u Wanboklang Tongwah. Nangta, ha ka jingïakop kren muk-mak la jop da ka Paleisha Shylla, ba ar u Comfortiness Thongni bad ba lai u Mebawanbet Tongwah.
Ïa ka jingïalang la pynïaid da ka kong Evary Lyngkhoi, District Mission Co-ordinator, District Hub for Empowerment of Women (DHEW), South West Khasi Hills District bad jingkren khublei na u bah Valdo E. Mawlot, Gender Specialist, District Hub for Empowerment of Women, South West Khasi Hills District.