Ngi wan thep vote watla noh ka rta ba ngi kwah ïa u nongmihkhmat ba kitkhlieh, ong ki shipara

Nongpoh, Rymphang 21: Ki ar ngut shi para na ka Shnong Nongpoh ha Ri Bhoi District mynta ka sngi wat ha ka jingnoh ka rta ba la tymmen bad ki la mih pat shakhmat ban wan thep vote ha kane ka election MDC na Nongpoh Constituency da kaba ki la pynpaw ba ki angnud ban ïoh ïa uta u nongïalam ne u nongmihkhmat uba don shisha ka jingkitkhlieh ïa ka eh ka shon ka jaid bynriew.
Kine ki ar ngut shi para kiba la wan ban thep vote wat ha ka jingnoh ka rta, ki kynthup ïa ka Kong A.B Sweetly ha ka rta kaba 80 snem bad ka Kong S.Sweetly ha ka rta kaba 76 snem, na ka shnong Nongpoh ba hap ha ka Nongpoh Constituency ha Ri Bhoi District.
Haba kren sha ki lad pathai kitei ki ar ngut shi para, ki la pynpaw ba wat ha ka jinglong tymmen ne noh ka rta ki hap ban wan ban thep vote ha kane ka election MDC ban jied ïa kita ki nongmihkhmat sha KHADC bad ka daw kaba ki la wan ban thep vote ka long ba ki kwah ban ïoh ïa kita ki nongmihkhmat kiba shim shisha ka jingkitkhlieh ban ïada ïa ka ri bad ka jaid bynriew.
Ki la pynpaw ruh ñba ka Election MDC ruh ka long kaba kordor bad kaba kongsan ha ka jaid bynriew jongngi, namar ki nongmihkhmat kiba ngi jied ha kane ka election MDC, ki dei kita ki nongmihkhmat kiba hap ban shim ïa kata ka jingkitkhlieh kumno ban ïada kyrpang ïa la ka jaid bynriew ha kaba ka District Council ka dei kata ka shlem kaba ki nongmihkhmat ba la jied da u paidbah ki hap ban kit khlieh ïa la ka jaid bynriew.
“Dei ha District Council ba ki MDC ki hap ban shna ïa kita ki aiñ kiba khlaiñ kiba lah ban pynneh pynsah ïa ka riti ka dustur ne ïa ka jinglong tynrai ka jaid bynriew Khasi jongngi” ki la ong, bad bynrap ruh wat la ngi noh ka rta ha ka jinglong tymmen ba ngi don pat ka jingkitkhlieh ban hap ban jied ïa kita ki nongmihkhmat bad dei kita ki nongmihkhmat kiba hap ban shna ne pyntreikam ïa kita ki aiñ ba kyrpang kiba lah ban ai jingïada ïa ka jaid bynriew jongngi” ki la bynrap.
Ha kane ka sngi, ki la pynpaw ruh ba ki dap da ka mynsiem jong ka jingkmen ba ki la lah ban pyndep ïa la kamram ban jied ïa uta u nongmihkhmamt bad ha kawei ka bynta ki la pynshlur ruh ïa ki paidbah ba ki dei ban shim ïa ka jingkitkhlieh ban thep vote, namar dei tang kita ki nongmihkhmat kiba ngi la jied ban phah sha kata ka ïing thaw aiñ ha KHADC ki lah ban ïada ne shna ïa kita ki aiñ kiba khlaiñ kiba ai ïa ka jingïada ba kyrpang ïa ki riti ki dustur bad ïa ka jinglong tynrai ka jaid bynriew Khasi jongngi, ki la bynrap.