Ngi sheptieng ïoh u kontraktor un khang lada ym pat ïoh lut ïa ka Bill: SRSSMA

Mawkyrwat, Nohprah, 12: Ka Synjuk ki Rangbah San Shnong Manad Area (SRSSMA) ki la pynpaw ka jingsngewnguh ïa ka Sorkar kaba la sngap ïa ki jingdawa ban pynïoh ïa ka jaka sumar ne Sub-center hapoh shnong Pyndenlyngdoh, South West Khasi Hills District.
Lah ban kdew ba kane ka jaka sumar kan ai jingïarap ne pynïoh jingmyntoi na ka bynta ki san tylli ki shnong kiba kynthup ïa ka shnong Pyndenlyngdoh, Lummawbah, Manad, Mawbidong, bad Pyndensohlang.
Haba kren sha ki lad pathai khubor, u Chairman jong ka Synjuk u Bah Reddy Shylla u la ong ba ha kaba ïadei bad ka Sub Center kaba la shna ha ka shnong Pyndenlyngdoh kum ki rangbah ki la ïohi ba ki nongtrei ruh ki la sdang ban don bad kane ka la pynkmen ïa ki paidbah namarba ka jaka sumar ka la don hajan ym shuh kumba long ha ki por ba la leit ba ki la hap ban kiew haduh Mawkyrwat.
Hynrei kaba sngewsih ka long ba u nongpyntrei (contractor) haduh mynta um pat ïoh lut ïa ka jingsiew ne ka Bill, kumta kum ki rangbah jong ka thaiñ San Shnong Manad ki don ka jingsngew syier ïoh lehse u nongpyntrei un sa khang ha kano ma ka por.
Namarkata, ki buh ka jingkyrpad ïa ka Sorkar ba ka dei ban pynbiang noh mar dor ïa ki jingdonkam kiba dang duna khnang ba kane ka jaka sumar kan ïaid beit ïaid ryntih ha baroh ki liang.