Mawkyrwat, ‘Nailar 17: Ki khun ki hajar ryngkat ki ‘riew rangbah jong ka Hima Langrin Syiemship (HLS) baroh kawei mynta ka sngi ki la mihshakhmat ban ai jingpynshai ha ki paidbah lyngba ki lad pathai khubor ha ka Press Conference ha Mawkyrwat na ka daw ba ki la sngewkhia halor ka jingmih ki kynrum kynram ha kine ki sngi ba la dep.
La ong ruh ba katkum ka jingïathuh jong ki, ba ka jingmih ki kynrum kynram hapoh ka Hima ka dei lyngba ki katto katne ki heh spah kiba dei napoh ka Hima bad kumjuh ruh kiba nabar ka Hima kiba kwah ban long nongshynshar hapoh jong ka da kaba ki kwah ban ïalam bakla ïa ki paidbah bad ki bym shem la sngewhun ban shah shynshar hapoh ha jinglamkhmat jong u Pa’iem Nangtei Syiemiong uba long mynta kum u syiem jong ka Hima Langrin Syiemship.
Haba kren ha ki lad pathai khubor, u bah Khristopher Lyngdoh, u bah Shanbor Thongni bad bah John Justice Hahshah ryngkat da ka jingïadonlang ruh kiwei de ki ‘riew rangbah, ki la ong ba ha kaba ïa dei bad kine ki kam huri hura hapoh ka Hima Langrin ma ki ki kwah ba kan kut noh da kaba ki ong ruh ka jingmih jong ki katto katne ki ‘riew shimet ki bym don ka jinghun ïa ki rukom treikam jong u Pa’iem Nangtei Syiemiong ka pynïalam bakla ïa ki paidbah jong ka hima.
“Ngi shaniah ïa ka jingsynshar jong u Pa’iem Nangtei Syiemiong bad kam shem la don kano kano ka jingleh shilliang ne synshar donbor ha ki kam baroh”, ki la ong. Namarkata, ki la buh ka jingkyrpad ïa kito ki briew kiba ju pyndonkam bakla ïa ki paidbah hapoh ka Hima Langrin ba kim dei shuh ban dang ïalam bakla nangne shakhmat namar ba baroh ki paidbah hapoh ka Hima ki hun bad kim shem la don kano kano ka daw bad ki don ha ka shongsuk shongsaiñ hapoh ka Hima, bad katkum ka jingshah kynnoh ba u syiem u synshar donbor, kane ka long kaba bakla.
Ha kawei pat ka bynta, ki la buh ka jingkyrpad ïa u Chief Executive Member (CEM) jong ka Khasi Hills Autonomous District Council (KHADC) ba kum ïa kane ka kam ki dei ban bishar bniah bad kim dei ban shaniah ïa kum kita ki briew kiba kwah bor tang ha lade bad tang na ka bynta ban ïoh long kum ki Lyngdoh, ki nongsynshar hapoh ka Hima Langrin Syiemship namar kine kiei kiei baroh ki mih tang na ki katto katne kiba kwah ban pynkhyllem bad pynduh ïa ka khet syiem.
Haba ai jingkren, ki la ong ruh ba naduh ba la shimti u Pa’iem Nangtei Syiemiong kum u syiem jong ka ka Hima Langrin Syiemship naduh u snem 2011 haduh mynta ki khun ki hajar ki mad ka jingshongsuk shongsaiñ haduh kine ki sngi mynta, kumta kim kwah shuh ba kin mih biang ki jingïakulmar ne huri hura hapoh ka Hima hynrei ki da kwah ba kane ka jingsuk kan neh na ka bynta ka jingbha ïa ki khun ki hajar.
