Ngi pyrshah ïa ka jingthmu pynkynriah ka Sorkar ïa ki Harijan : DS Mawbah

Shillong, Naitung 19: Ka Dorbar Shnong Mawbah ha ka sngi Baar jong ka 19 tarik ka la leit ban ïakynduh ïa u Bah Prestone Tynsong uba dei u Chairman jong ka High Level Committe ban pynpaw ïa ka jingpyrshah jur ïa ka jingthmu jong ka sorkar ban pynkynriah ïa ki Harijan kiba shong ba sah ha Them Ïewmawlong sha ka jaka kaba don ka jan ka RP Chest, Hospital kaba don ha ka jylli synshar jong ka Dorbar Shnong Mawbah.
Haba kren sha ki lad pathai khubor u Bah David Syiemlieh u la ïathuh ba kane ka jingpyrshah jong ka dorbar shnong ka dei beit namar ka jingkhap ngiah lupa jong ki nongshong shnong kiba la poi kumba 14 hajar bad ka jingbym lah ban shaniah ïa ki Harijan ioh kan mih ka kynrum kynram hadien habud
“Tang ki nong shong shnong kiba la don lupa ngi la kynjoh kumba 14 hajar mut dur lada wan sa kine khlem pep kan buh jingeh ïa ka shnong bad ki bor synshar” ong U Bah David.
Shuh shuh u Bah David u la ong ba ka jingpyrshah jong ka Dorbar Shnong ka dei ba kam kwah satia ba kan mih ka Colony hapoh u pud nbad ka jylli synshar jong ka.
Shuh shuh u la ïathuh ruh ba ka Dorbar Shnong ka la ai jingmut ba ka sorkar kan pynsah ïa ki Harijan ha ki Quater jong ki tnad bapher bapher ba ki trei ym ban ai da ka jaka ba kin shna ïing bad kam trai syndon.
Haba la kylli pat kaei ka jingkular jong u Bah Prestone u Bah David u la ïathuh ba u la kular ba un sa peit bniah biang ïa kane bad un sa ai ktien ha u MLA ka constituency ïa kaei ka rai ka sorkar.
Shuh shuh haba pynrap lang u Secretary jong ka Dorbar Shnong u Bah Aris Thabah u la ïathuh ba ha ka jingilang kaba ka Dorbar Shnong ka la lum ïa ki trai ïing kiba don ha ka shnong ki9 la pynpaw da kawei ka sur ba ki pyrshah triang ïa kane ka rai jong ka sorkar.
U Bah Aris u la ïathuh ruh ba ka jingpyrshah ïa kane ka jingthmu kasorkar ba kum ka dorbar shnong kam kwah ban wan shah tyllep shuh shuh da ki briew kiba na bar namar ki Khasi kiba sah ha kane ka shong ki la rit paid shaba palat.
“Ïoh ba kan jia ka apot ba ka ka Dorbar Shnong Mawbah kan jah noh bad mih da ki Panchayat Comittee jong ki bad lada ngi donkam kino kino ki kot ki sla na ka Dorbar Shnong ngin hap leit nguh leit dem na ki Panchayat Committee jong ki namar ki la heh paid lupa bad namar ngi la tip lupa ki dei ki jaidbriew kiba kumno” ong u Bah Aris
U Bah Aris u la ïathuh ruh ba u Bah Preston u la ïathuh ba ka sorkar ka thmu ban pynsah ïa kine ki Harijan ha ki jaka bapher bapher ym tang shi jaka ïa baroh.
Haba bynrap lang ïa kane u Bah Mohnedro Rapsang u la ïathuh ba u Bah Prestone u la ïathuh ba ka sorkar kam pat shim ïa ka rai kaba khatduh hynrei kane ka jaka kaba ha Mawbah ka dei tang kawei na ki jaka kiba ka ithuh ba ka lah ban pynkynriah.