Ngi pyrshah eh ïa ka jingthmu ka UCC, hynrei ngim pdiang ïa ka Resolution, ong u CM

Shillong, Nailur 21: Ka Meghalaya Legislative Assembly ha ka sngi Palei, kala kyntait ban pdiang ïa ka jingdawa jong ka Liang Pyrshah ban mynjur da ka Resolution ha kaban pyrshah ïa ka Uniform Civil Code (UCC) da kaba ai daw ba ïa kane ka Bill ym pat wanrah satia ha ïngdorbar Parliament jong ka ri India.
Ia ka Resolution ban pyrshah ïa ka UCC la wanrah da u MLA ka Congress na Mawhati Bah Charles Marngar bad bala kyrshan da ki MLA ka All India Trinamool Congress (AITC) bad ka Voice of the People Party (VPP).
Haba jubab, u Myntri Rangbah Conrad K Sangma ula ong ba ka Sorkar Jylla ka pyrshah eh ïa ki jingthmu bad jingmut jong ka UCC namar ka ïaid pyrshah ïa ka nongrim jong ka ri India kaba shongshnong da bun jait ki jaidbynriew.
Hynrei, ka Sorkar kam lah ban shu mynjur ïa ka Resolution dang mynta khlem da tip shuwa ïa kiei ki mat kiba don ha ka UCC Bill.
U Myntri Rangbah u la ong ba kam long kaba dei kum ki nongmihkhmat ne kum ka ïingdorbar ban pyrshah ïa kano kano ka Bill kaba ym pat ïohi ne ka long kumno. “Hato ka long kaba dei seh ban pyrshah ïa kano kano ka kam kaba ngim pat da tip bha, khamtam eh kum ki nongmihkhmat paidbah”, u la ong.
Ula ong ba kane kam mut ba tang namar kiwei ki Jylla kila leh, ka Meghalaya ruh ka dei ban mynjur lang ia ka Resolution. Namar kata, kan dei tad hadien ba la ïohi ïa ka UCC Bill, yn sa lah ban shim ïa ka nongrim kum ka Sorkar.
Nalor kane, u Myntri Rangbah ula kular ruh ba ka ïingdorbar kan ïeng tylli kawei ban pyrshah ïa kano kano ka sienjam jong kino kino ki bor kynthup ïa ka Parliament ban pyntroiñ ïa ka jinglong kyrpang, ka hok bad ka riti ka dustur jong ki trai paid riewlum ka Jylla Meghalaya.