Ngi pynsngew ïa ka sur u paidbah, ngi khlem leh pyrshah sorkar, khyrwit sa u Bah Hek

Shillong, Jylliew 14 : U MLA ka BJP na Pynthorumkhrah, Bah AL Hek ha ka sngi Ba-ar u la ong ba ka jingkren jong u halor ka jingkhyllem u Dome jong ka Iing Dorbar Thawaiñ bad ruh halor ka jingjaw ka Interstate Bus Terminus kam dei satia ba u kren pyrshah sorkar kumba la kynnoh hynrei kadei beit ba u pynsngew ïa ka sur jong u paidbah.
Na ka liang utei u nongmihkhmat ba dei ruh u Myntri barim ka sorkar jylla u la ong, “Ngi don lut ki hok ban pynsngew ia ka sur jong ki paidbah, kumno ki pyrshang ban pynsngewthuh bakla halor kane.”
U Bah Hek u ong ruh ba katei ka jingkren jong u, kam dei satia ba u kynthoh ïano ïano hynrei kaei kaba u kren ka long ban pynsngew ïa kaei kaba ki paidbah ka jylla ki mad.
Haba pynshai pat halor ka jingkynnoh da ka Liang Pyrshah ba ka don ka jingïapait ha ka UDP haba ïadei bad ki ishu, u Bah Hek u la ong, “Kaei kaba ngi kren baroh kadei na ka bynta ka jylla bad ki paidbah. Kumta ban ong bad kynnoh ba u Bah Sanbor u ong da kumwei pat uwei da kumwei pat kam dei satia. Lehse, tang namar ngi don la ki jong ki jingsngew kam mut pat ba ka don ka jingïapher ha ka BJP.”
Kum u Chairman jong ka Central Scheme Monitoring Committee, u Bah Hek u la ïathuh ruh ba haduh mynta kim pat phah ïa ka kaiphod kaba ki lap ha ka jingbuddien ïa ki skim bapher bapher jong ka sorkar pdeng kiba pyntrei ha kane ka jylla. “Ngi la bthah ïa Secreteary ka Monitoring Committee kaba dang pynkhreh bad pynbiang lut mynta bad hadien ba la dep ngin sa phah pat sha ka tnad ba dei peit jong ka sorkar pdeng.”