Shillong, Nailur, 24: U President jong ka Meghalaya Government Lower Primary School Contractual Teachers’ Association (MGLPSCTA) u Babu Birbor Riangtem ha ka sngi Saitjaiñ u la ong kane ka kynhun ki nonghikai skul kontrak ka pynrem jur ïa ka jingkren jong u Myntri ka tnat Pule Puthi ka Sorkar Jylla u Bah Lahkmen Rymbui da kaba ong ba ka dei tang ka jingkren bym suidñiew.
Ha ka sngi Thohdieng u Bah Lahkmen Rymbui u la ong ba la khang ïa ka jingkhang ïa ki nonghikai skul Kontrak sha ka miej jingïakren ha ka jingïakren bad ki lad pathai khubor.
“Ngi pynpaw ïa ka jingsngewsih namarba u (Bah Lahkmen) la kren laplah khlem pyrkhat wat haba ngi la pynlong ka jingïakhih mynta la ar taiew tam hakhmat u durmot jong u Kiang Nongbah,” ong u President ka MGLPSCTA u Babu Riangtem.
“Kane ka jingkren ka pynpaw ïa ka jingbym burom ïa ka jingtrei shitom jong ki nonghikai Contractual ha ki phew snem ba ladep ha kaba ngi la pynmih ïa ki khynnah skul ban kiew sha ki kyrdan jong ka nam. Kane ka jingkren jong u ka pynkheiñ ruh ïa ka hok longbriew manbriew ha ka ri synshar paitbah,” la kynthoh u Babu Riangtem.
“Ngi pynrem jur ïa u Bah Lahkmen Rymbui halor ka jingkren bym suidñiew. Ka dei ka jingpynbor jong u ba ngin rung sha ka miej jingïakren da kaba ngi hap ban rung na kyrpong iing jong ka Sorkar MDA government. Lada u dei shisha u Myntri ka Sorkar uba don ka jingbah khlieh ïa ka jylla u ladei ban rah ïa ki mat ban thawlad ban pynbha ïa ngi ki nonghikai Contractual sha ka Kynhun Myntri.
Ha kaba ïadei bad ka jingbym lah jong ka Sorkar ban sngap ïa ka jingdawa, ka MGLPSCTA ka la rai ban leit tied biang ïa ka jingkhang jong ka Sorkar Jylla ban ïoh ïa ki jingdawa ha kaba ïadei bad ka jingdawa ban thungkam biang ïa ki 800 ngut ki nonghikai skul kontrak kiba la shah weng kam naduh u bnai Kyllalyngkot, 2021.
U Asst. Finance Secretary jong ka Seng u Babu Babit Huron ha ka jingïakren bad ka ki lad pathai khubor ha ka sngi Thohdieng, u la ong ba ka seng kan sa phah biang da ka jingthoh sha u Myntri Rangbah ka Jylla bad kumjuh ruh sha u Lat ka Jylla ba un tuklar lem halor kane ka jingdawa.
Ha kajuh ka por u la ong ba lada ka Sorkar ka dang ïai leh mynthi ka seng kam banse ban phah syndon da ka jingthoh sha ka Meghalaya State Human Rights Commission (MSHRC) ban tuklar lem halor kane.
