Ngi pdiang sngewbha lada don kiba kwah ïateh lok shuwa ne hadien ka ilekshon: Congress

Shillong, Nailur 05: Ka seng Congress ha ka sngi Nyngkong lyngba ka National Spokeperson jong ka ka Babeeta Sharma ka la pynpaw ba na ka liang ka party ka long kaba kloi ban ïatehlok bad kino kino ki seng saiñ pyrthei ban ïakhun ïa ka ilekshon MLA ha u 2023 ne ban teh lok hadien ka ilekshon.
Haba kren bad ki lad pathai khubor ka la ong ba lada don kino kino ki seng kiba kwah ban ïakhun lang ïa ka ilekshon na ka liang ka party ka pdiang sngewbha bad kan long ruh kumjuh hadien ka ilekshon lada ki kwah ban don lang ha ka juh ka kynhun ban trei lang bad ka party.
Haba ïadei bad ka jingïatehlok ka BJP bad ka NPP ha ka jylla bad ka jingrai ka NPP ban ïakhun hi marwei ïa ka ilekshon ha u snem 2023 ka Babeeta Sharma ka la ong ba ka NPP ka sngewthuh shai ba lada ki don lang ha ka juh ka kynhun bad ka BJP kin ym jop satia ïa ka ilekshon. Ka la ong ba kine ki seng sain pyrthei kiba don lang ha ka BJP ki dei ban weng noh namar u paidbah un ym ai jingkyrshan satia.
“Ka NPP ka sngewthuh shai ba lada ki leit sha u paidbah da ka juh ka kynhun bad ka BJP ki paidbah ka jylla kin kyntait ïa ki, kane ka jingrai ka NPP ban ïakhun marwei ka dei tang ka buit ban phon ïa ki paidbah namar hadien ka ilekshon kin don lang biang ha ka juh hi ka kynhun” ka la ong.
Haba jubab halor ki MLA ba phet na ka seng ka Babeeta Sharma ka la ong ba lada ki kwah ban wanphai ka jingkhang ka party ka plie ïano ïano ban wan sha ka seng.
“Lada ki kwah ban phai sha ka seng ngi pdiang beit kumba ka party ka pdiang ïa kiba kwah rung, ïa kiba kwah mih ruh ngim lah ban bat jubor namar kiba neh bad ka Congress ki dei ban long hi kiba neh da ka mon ban ïakhun lang ïa kawei ka thong” ka la ong.
Haba kren halor ka jingpynkhreh ïa ka ilekshon ka Babeeta Sharma ka la ong ba ka don jingkyrmen kaba skhem ba ka Congress kan wan ha ka bor ha ka jingïalam u Bah Vincent Pala kum u President namar wat ha u 2018 ruh ki paidbah ki pynjop bun tam ïa ka party bad ka jingbym ïohthaw sorkar ka shu lait tang da ka tyrsim ïong ka la ong.
Ka la ong ruh ba lada kum ka party ka trei shitom ki paidbah kin ai biang ïa ka jingshaniah ha ka ilekshon MLA kaban long ha u 2023.