Ngi pdiang ïa ka jingpynbeit pud, ngi pyrshah ba bun ki bym dei ki jaka kajia pud ki leit sha Assam

Nongpoh, Ïaiong 03 : Ka Khasi Student Union, North Khasi Hills District kala pynpaw ka jingpyrshah kaba jur halor ka jingpynbeit pud ka Meghalaya bad Assam haka thaiñ Ri-Bhoi kaba la wanrah ka huri hura bad ka jingdum ïaki paidbah ba shong ba sah ha ka thaiñ Maikhuli namar ba bun naki shnong ka jylla Meghalaya kin leit noh sha Assam haka MoU bala soi hapdeng ki 2 jylla ban pynbeit noh ïa u pud u sam.
Haba kren sha ki nongthoh khubor u Samla Ferdinald Kharkamni President ka KSU NKHD u la ong ba ka seng ka ai ka jingïaroh ïaka sorkar kaba la shimkhia ban pynbeit noh ïa u pud u sam, hynrei ka pynpaw pat ka jingsngewsih ba katei ka jingpynbeit pud ka wanrah ïaka huri hura bad bun naki jaka jong ka jylla ki hap noh sha Assam namar ka sorkar jylla lyngba ka Regional Committee kaba la thung kala shu trei tang dep khlem da kynjoh ktien ïaki nongïalam Raid, ki Hima ban pynshisha lyngba ki kot ki sla bad ka jingsngew jong ki paidbah, hynrei la shu rai thurmur bad pynhap wat ïaki shnong kiba ym don satia kano kano ka jingkajia pud bad bala tip thikna ba ki dei ki shnong jong ka jylla Meghalaya.
U la ong ruh ba naka liang ka seng kala dep ban thaw ïala ka jong ka Border Research Committee ha shuwa baka sorkar kan thaw ïaka Regional Committee bad naka liang ka committee jong ka seng kala dep ruh ban leit jurip ban ïakynduh ïaki nongïalam jong ki It ki Hima jong ka Hima Jirang, Hima Sohiong, Hima Nongspung, Hima Mylliem bad kumjuh ruh ki Hima jong ka thaiñ Block II haka Raid Nongtung ha kaba naka liang ka seng kala dep ban ïakynduh wat ïaki nongshong shnong ban lap ïaka jingshisha bad ban phah pat ïaka kaiphod sha ka sorkar.
Hynrei kaba sngew lyngngoh ka long ba wat ki nongïalam shnong Nongïalam Hima kum ka Raid Warmawsaw Umsohbar kim ioh satia wat tang ban pyni ïaki kot ki sla ban pynshisha ïaki jaka puta sha ka Regional Committee jong ka sorkar bad kane kala pynbitar ïaki nongïalam seng ba tang namar ka jingtrei tang dep jong ka Committee bun naki jaka jong ka Ri Khasi kin leit sha Assam kaba la shu shim rai tangdep bad khlem tip eiei ïa u pud u sam bad ka rukom synshar haki shnong khappud ka Ri-Bhoi District lyngba ki Raid, ki Hima bad ki shnong.
“Ki shnong kum ka Jimbrigoan, Patgoan bad Lyngkhung kim dei satia ban leit sha Assam, bad ka skul sorkar kaba don haka shnong Lyngkhung ka pynshisha ba katei ka shnong ka dang hap haka jylla Meghalaya” u la ong da kaba bynrap ruh ba kum ka seng ka dap da ka jingsngew lyngngoh kaba khraw ba kumno kata ka Regional Committee jong ka sorkar ka leit ruh ban pynlong jingïalang wat haka por mynmiet kumba 8 baje haka shnong Maikhuli khlem ka jingtip jong ki paidbah nongshong shnong bad ban shim ruh ka rai ban pynhap ïaka pung kaba don ha katei ka shnong sha Assam.
U la ong ruh baka shnong Maikhuli kam dei satia kaba don haka jingkajia pud bad wat ka Dreamland Amusement Park kaba don haka thaiñ Khanapara kam dei kaba don haka jingkajia pud bad ki trai jong katei ka park ruh ki dei ki khasi hynrei la shu pynhap jubor ïa katei ka jaka sha Assam.
U Samla Kharkamni u la ong ruh ba ka seng kam pyrshah ïaka jingpynbeit pud hynrei ka seng ka pyrshah ïaka jingleit ai sngewbha ïaki shnong ka jylla Meghalaya sha Assam da kaba khohreh jubor bad pyndep rukom ban pynbeit ïa u pud u sam khlem da bishar bñiah ïaki kot ki sla bad ka jinglong trai ïaki jaka kaba long ka jingduhnong kaba khraw khamtam ïaki nongshong shnong bad ki paradoh parasnam kiba shong haki thaiñ khappud bad kane ka buh ïaki paidbah hapdeng ka jingdum bad kum ka seng kan nym shongkli kti hynrei ban don ryngkat bad ki paidbah ban shim pat da kiwei ki lynti.