Ngi ngeit skhem U Blei un sa sei ïa u briew ban mih bujli ha ka jaka jong u Dr. Ricky AJ Syngkon: Ardent

Shillong, Rymphang 20 : U Nongïalam ka Voice of the People Party (VPP) u bah Ardent Miller Basaiawmoit u la pynpaw ka jingsngewsih bad kyndit kaba khraw eh halor ka jingkhlad ba kyndit kyndit jong u MP ka Shillong Parliamentary Constituency u Dr Ricky AJ Syngkon, uba dei ruh u para nongseng lang jongka Party hynrei ha kajuh pat ka por u pynpaw ka jingkyrmen skhem ba U Blei un sei ïa u briew u ban mih bujli ha ka jaka jong u Dr Ricky u ban ai ka jingshakri hok ïa ki paidbah kumba ai une u MP ba mynta.
“ Nga ngeit skhem ba U Blei un sa pyndap ïa ka jaka ba thylli kaba la iehnoh da u Dr Syngkon. Ngi kyrmen ba U Blei un ym shah ba kane ka jaka kaba la kit ïa ka lyngkor da u Dr Ricky kan thylli baroh shirta hynrei un sa sei ïa u briew u ban mih bujli bad pyndap ïa kane ka jaka ba thylli” ong u bah Ardent.
“ Da ka mynsiem kaba sngewsih kthang bad kyndit eh ngi la ïoh jingtip halor ka jingiap ba kyndit kyndit jong u paralok, u para dkhot bad u para nongseng lang jong ka VPP bad kum ka party ngim ju poi pyrkhat ba kane kan jia namar u dei u briew uba sumar bha ïa ka jingkoit jingkhia ka met ka phad” ong biang u bah Ardent Basaiawmoit.
“ Ngi tip ba u dei uba koit ba khiah bha. Haba ngi ïoh khubor ba u kyllon ha madan bad um tip briew shuh ngi la ïa khuslai jingmut shikatdei eh bad ngi la sngewsih kthang haba ngi la ïoh jingtip ba um don shuh ha sla kane ka pyrthei. Kum ka party ngi don hapdeng ka jingsngewsih kthang bad ka jingkyndit kaba khraw eh” ong biang u bah Ardent.