Ngi nang hiar ha ka pule puthi ynda ngi ïoh jylla: Adelbert

Shillong, Nailur 02: U Symbud Myntri Rangbah ka jylla u Bah Prestone Tynsong ha ka sngi Thohdieng haba ai jingkren ha ka jingrakhe ïa ka lyngkhuh ba 131 snem naduh ba la seng ïa ka Mawkhar Christian Higher Secondary School, Shillong u la ong ba ka jylla ka la kiew shaphrang ha ka pule puthi lada peit ïa ka jingdon kiba la nang ban thoh ban pule bad kum juh ka jingkyntiew ka sorkar ïa ka mang tyngka na bynta ban kyntiew ïa ka.
Ïa kane u la kren haba pynphai nia ïa ka jingkren u MLA ka North Shillong u Bah Adelbert Nongrum ba ki san phew snem jong ka jingïoh jylla kam don satia kano kano ka jingkiew ha ka pule puthi bad ka jingïakhih ki nonghikai ka pynphalang ïa jinghiar kyrdan ka pule puthi ha ka jylla.
U Bah Prestone u la ong ba ka jylla ha u snem 1972 mynba ngi dang ïoh ïa la ka jong ka jylla ka Literacy Rate kam poi satia tang 25 percent katba hadien 50 snem ka la jan kot sha ka 80%. U la ong ruh ba ka jylla ka la kiew ha ka mang tyngka na bynta ka tnad pule puthi na ka 300 klur ha u snem 1972 sha ka 4,500 klur tam ha ka snem mang tyngka 2022-23 bad u la kam ba kine hi ki la dei ki mawser ban thew la kum ka jylla ngi nang hiar ne nang kiew hadien ba ngi la ïoh la ka jylla.
“Ngam ong ba kaei kaba ka sorkar ka leh ka la biang hynrei nga shu kwah ban kdew ba ngi la jam sha khmat bad dang bun kiei kiei kiba ngin dang hap ban leh na bynta ka pule puthi ha ka jylla” ong u Bah Prestone.
Ha ka jingkren jong u Bah Adelbert u la ong ba ka jylla kaba ki nonghikai ki hap mih surok ban dawa ïa ka bainong ba dei hok ka pynphalang ba ngi nang hiar pynban ha ka pule puthi namar kum kane ka jingjia kam ju kham jia koit ha ka history ka jylla.
Haba ïadei bad kane u bah Prestone u la ong na ka liang ka sorkar jylla ka la kyntiew ïa ka mang tyngka na bynta ki skul adhoc na ka pla jong ka da 300 klur bad kane hi ka hap ban kyntiew ïa ka mang tyngka da 300 klur ha ka shisnem.
Shuh shuh u bah Prestone u la ong ba ka jingpynlut ka sorkar na bynta ka pule puthi ha ka shisnem kam duna ïa ka 2,00 klur khlem da kheiñ ïa ka jingpynlut na bynta ki jingtei jingshna.