Ngi long kiba la khreh ban sei ki nongïalehkai hapoh ka madan elekshon GHADC, ong u Rakkam

Shillong, Jylliew 05: U nongïalam ka NPP bad u Myntri ka sorkar jylla u Rakkam A Sangma ha ka sngi Palei u la ong ba ka party jong u, ka la pynkhreh ha ka elekshon ka ban wan sha ka Garo Hills Autonomous District Council (GHADC).
“Hapoh ka jingïalam ba shemphang jong u Myntri Rangbah ka jylla u Conrad K Sangma, ngi la long kiba la pynkhreh ban mih madan na ka bynta ki elekshon sha GHADC,” ïathuh u Sangma sha ki lad pathai khubor.
“Ngi tip bha ïa ka madan ïalehkai saiñ pyrthei jong ka jylla. Ngin buh ïa ki nongïalehkai kaba long katkum ka jaka bad ka madan ïalehkai,” u la bynrap.
Haba pdiang sngewbha ïa ka seng saiñ pyrthei kaba don ha ka liang pyrshah ka Voice of the People Party (VPP) halor ka rai jong ka ban ïakhun ïa ki elekshon sha GHADC, u nongïalam ka NPP u la ong ba lada ki kwah ban long ka party ka jylla, ki dei ban poi sha baroh ki kyndong kynshrot jong ka jylla.
“Phi dei ban pyni ïa ki rong jong phi bad ban ïalap sha ki paidbah. Lada phi kwah ban kiew, phi dei ban shah pdiang sngewbha da baroh, bad ngim dei ban ieh ïa kino kino ki kamra na ka bynta ki jingshah kynthoh. Ngim dei ban don u pud u sam uba donkam ban dro, nga sngew ba ki dei shisha ban pyrshang sha kane ka thaiñ,” pynpaw u Rakkam sha ki lad pathai khubor.