Shillong, ïaïong, 12: U Myntri Rangbah ka Jylla u Conrad Kongkal Sangma ha ka sngi Baar ula ong ba ka Sorkar Meghalaya bad ka Sorkar Assam ka la pynkhreh shaid shaid ban pynsdang noh ïa ka jingïakren pynbeit pud na ka bynta ki hynriew tylli ki jaka ïakajia pud kiba dang sah.
“Ngi dang pynkhreh bad ngim pat buh sngi,” ong u Sangma haba ïakren bad ki lad pathai khubor.
Kane ka jingkren jong u Myntri Rangbah ka long hadien ba u Myntri Rangbah ka jylla Assam u Himanta Biswa Sarma ha ka 6 tarik mynta u bnai u la pynbna ba ka jingïakren pynbeit pud ha ka kylla kaba ar kan sa long la kumno kumno ha u bnai Jylliew ne Naitung mynta u snem.
Haba kylli, u Sangma u la ong, “ngi la don ka jingïasyllok. Ngi la ju ïakren ïa kane ka mat na ka por sha ka por bad ngi kwah ba kane ka jingpynbeit ïa u pud u sam kan dep noh namarba ngi sngewthuh ba ka dei ka kam kaba la slem bad ki paidbah ki la mad jingeh haduh katta katta.”
U la ïathuh ba ka jingïakren hapdeng ka Sorkar Meghalaya bad Assam ka lah ban long ha u bnai Jylliew lane Naitung hynrei ka jingïakren hapoh ka Sorkar Jylla ka la ïaid shaphrang kumno ban pynkhreh na ka bynta kaba bha tam.
Ka Sorkar Meghalaya bad Assam ki la ïasoi ïa ka Memorandum of Understanding (MoU) ha New Delhi ha ka 29 tarik, Lber mynta u snem ban pynkut noh ïa ka jingïakajia pud jong ki 6 tylli na ki 12 tylli ki jaka ba ïakajia pud, ha kaba la sakhi lang da u Myntri ka tnat Kam Pohing u Amit Shah.
U Himanta Sarma dang shen u la pynpaw ba ka tnat Survey of India ka la sdang ban sorjamin ha ki hynriew tylli ki jaka khnang ban pruiddak ïa u pud u sam uba biang.
“Katkum ka jingïasoi jong ngi ïa ka MoU kin (Survey of India) sa sieh ïa ki mawpud bad hadien kata ïa ka soskular yn sa pyndep syndon,” ong u Sarma.
