Ngi la pyndep bun ki kular election ai burom da kaba pynjop biang ïa u bah Lamphrang Blah : Dy CM

Shillong, Rymphang 17 : U President ka National People’s Party (NPP) bad Symbud Myntri Rangbah Bah Prestone Tynsong ha ka sngi Nyngkong, ula kyntu ïa ki paidbah ka Mawphlang-Diengiei ban jied biang ïa u MDC ba mynta bad Chairman ka KHADC Bah Lamphrang Blah kum ka dak ka jingburom ïa ka Party (NPP) namar ka la pynurlong ïa kiba bun ki jingkular election hapoh ka constituency.
Haba kren ha ka rynsan ïalap elekshon ha Mawngap, u bah Prestone ula ong “Ngi la pynurlong ïa baroh ki jingkular jong ngi ha ka elekshon bala dep la ka dei ka surok, sub division, college bad hospital. Nga tip ba ki dang don bun ki kam ba hap leh hynrei nga kyrpad ïa phi ba kum ka jingburom ïa ka NPP bad ïa nga kum u President ka party ha Jylla, ba phin ai ïa ka jingkyrshan ba pura ïa u Bah Lamphrang Blah, uba la shah jied la saw samoi kynthih. U dei u nongïalam uba la ih bha”.
“U Bah Blah u khlem jop ïa ka elekshon MLA. Nga la wadbniah bad nga sngewthuh ba ka dei namar ba u dei u MDC. Nga I kumba ngi donkam la u jong u MDC bad MLA. Kumta, ngi dei ban ailad biang ïa u sa shisien namar u dei uba la tbit bha (specialist) mynta bad ula bat ïa shibun ki kam hapoh KHADC” ula bynrap.
Halor ka jingkynnoh high-level pyrshah ïa ka NPP, u Bah Prestone ula ong “Ki (Liang Pyrshah) ki la pynmih ïa kum kine ki jingkynnoh la kumba ki don ïa ki sakhi. Ngam pat ju ïohi ïa ki ba kin leit ban ujor ejahar pyrshah ïa u Prestone ne Conrad ne ki Myntri hynrei ki nang ban ujor ejahar tang ïa kito kiba kren pyrshah ïa ki ha ki social media. Kane ka dei tang ka jingpynsyrwa kai ïa ka por namar kim lah ban ïoh ïa ka vote jong ki. Ki shu kut ka kren baheh hynrei nga ong ba lada phi nud ban byrngem ujor mukotduma pyrshah ïa ka Dorbar Shnong, kan eh aiu ïa ngi?.
Haba pynpaw ba ka Sorkar kam lah satia ban pynkheiñ ïa ki rule pyndonkam ïa ka pisa tyngka, u Symbud Myntri Rangbah ula ong “Ka Sorkar India ka don ïa ka CAG, ka bym ju map ïano ïano ruh kiba donkti ha ki kam bamsap. Kumta, wad ïa ka jingshisha ha ka jaka ban ngeit ha ki kam thok jong ki kynhun pyrshah”.
Haba ther ïa ka Liang Pyrshah Voice of the People Party (VPP), u Bah Prestone ula ong “U Nongïalam ka UDP ula kdew ïa kaba dei eh haba u ong ba ki don tang 4 ngut ki MLA hynrei ka jingïashrut hapoh ka party ka jur bha. Shu mutdur ba lada ki don 32 ngut ki MLA, nga tharai kane kan dei ka jingsdang jong ka thma bah balai”.
Haba kyrpad ïa ki paidbah ba kin nym shah ïalam bakla ha ka Liang Pyrshah (VPP), u Bah Prestone ula ong “Ngi la kut jingmut hok ban wanrah ïa ka roi ka par ha man la kawei pa kawei ka constituency. Ka EC ba ïalam da ka NPP ha KHADC kala thaw histori da ka jinglah ban pynïoh ïa ka jingmynjur u Lat ka Jylla ïa 7 tylli ki Bill. Kane kala wan jia namar ki ADC bad ka sorkar Jylla ki ïatreilang”.
Haba kren halor u soh ka jingtreikamjong ka Sorkar MDA ba ïalam da ka NPP, u MLA barim ka Mawsynram Bah Himalaya Shangpliang ula ong “Palat 2000 ngut la thungkam ha ka Tnad Pulit. Mynta u snem, ngin nang thungkam shuh shuh ïa ki Pulit hapoh ka Tnad”.
Haba kyntu ia ki paidbah ba kin shaniah ha ka NPP, ula ong “Ka party kam don por ban kynnoh ïano ïano ruh namar ka bunkam ban wanrah ïa ki kam pynroi sha ka Jylla”.
U Bah Himalaya ula ong ba ka Meghalaya kan sa ïoh haduh 1 lak tylli ki ïing na ka bynta ki longïing ba duk ha une u snem ba mynta.
“Shen ngin sap lie noh ïa ka Science College bad ka jingthungkam ïa ki nonghikai kan sa sdang noh. Ka dei ka college Sorkar bad ka bai klas kan dei kaba duna bha. Kane kala urlong namar u Bah Lamphrang Blah, uba la long kum ka jingkieng hapdeng jong phi bad ka Sorkar. Ula wan ïakren ïa ka Sorkar bad ka Sorkar kala ai ïa kine ki kam pynroi. Kumta, phin sa babe lada phim jied biang ïa u kum u MDC” ula bynrap.